9 ఏళ్ల ప్రేమకు శుభం కార్డు.. ప్రియుడిని పెళ్లాడిన జబర్దస్త్ ఫైమా

ప్రముఖ టెలివిజన్ హాస్యనటి, జబర్దస్త్ ఫేమ్ ఫైమా తన తొమ్మిదేళ్ల ప్రేమ ప్రయాణాన్ని వివాహ బంధంతో సుసంపన్నం చేసుకున్నారు. తన చిరకాల ప్రియుడు ప్రవీణ్ నాయక్‌ను ఆమె పెళ్లాడారు. బుధవారం హైదరాబాద్‌లోని ఓ రిజిస్టర్ కార్యాలయంలో అత్యంత నిరాడంబరంగా వీరి వివాహం జరిగింది. ఈ విషయాన్ని ఫైమా స్వయంగా సోషల్ మీడియా వేదికగా అభిమానులతో పంచుకున్నారు.

తమ వివాహానికి సంబంధించిన ఛాయాచిత్రాలు, వీడియోలను పంచుకుంటూ ఫైమా ఒక భావోద్వేగపూరితమైన సందేశాన్ని రాశారు. "చాలామంది మమ్మల్ని అనుమానించారు, విమర్శించారు. మమ్మల్ని విడదీయాలని కూడా ప్రయత్నించారు. కానీ, మా తొమ్మిదేళ్ల నిబద్ధత అన్ని అడ్డంకులను అధిగమించి నిలబడింది. విడిపోవడానికి ఎన్ని కారణాలు ఉన్నప్పటికీ, మేం ఒకరినొకరు తోడుగా ఉండాలని నిశ్చయించుకున్నాం. ఇప్పుడు మేము అధికారికంగా దంపతులమయ్యాం" అని ఆమె తన పోస్టులో పేర్కొన్నారు.

జబర్దస్త్, పటాస్ వంటి కార్యక్రమాలతో పాటు బిగ్ బాస్ తెలుగు రియాలిటీ షో ద్వారా ఫైమా తెలుగు ప్రేక్షకులకు చేరువయ్యారు. జబర్దస్త్‌లో ప్రవీణ్, ఫైమా జోడీగా నటించారు. ఆ సమయంలో వీరి ఆన్-స్క్రీన్ కెమిస్ట్రీ కాస్తా ప్రేమగా మారింది. అయితే, గతంలో వీరి మధ్య కొన్ని వ్యక్తిగత వివాదాలు తలెత్తాయనే వార్తలు వినిపించాయి. ప్రవీణ్‌కు వేరే అమ్మాయితో వివాహం జరిగిందని, వీరిద్దరూ విడిపోయారని అప్పట్లో పెద్ద ఎత్తున ప్రచారం జరిగింది.

అయినప్పటికీ, ఆ మనస్పర్థలన్నింటినీ పక్కనపెట్టి ఫైమా, ప్రవీణ్ ఇప్పుడు ఒక్కటయ్యారు. వీరి వివాహ వీడియో ప్రస్తుతం సామాజిక మాధ్యమాల్లో వైరల్ అవుతుండగా, అభిమానులు, బుల్లితెర సహచరులు ఈ నూతన దంపతులకు శుభాకాంక్షలు తెలుపుతున్నారు. ఎన్నో ఒడిదుడుకులను ఎదుర్కొని తమ ప్రేమను గెలిపించుకున్నందుకు పలువురు వారిని అభినందిస్తున్నారు.