పెన్ రీఫిల్‌కు 'జెడ్ ప్లస్' సెక్యూరిటీ.. ముంబై ఎయిర్‌పోర్ట్ వీడియో వైరల్!

ముంబైలోని ఛత్రపతి శివాజీ మహారాజ్ అంతర్జాతీయ విమానాశ్రయంలో ఒక చిన్న సంఘటన దేశ ప్రతిష్ఠ‌పై పెద్ద చర్చకు దారితీసింది. ఫారాలు నింపే కౌంటర్ వద్ద తాడుతో కట్టి ఉన్న ఒక పెన్ను రీఫిల్‌ను చూసిన ట్రావెల్ బ్లాగర్, దానికి 'జెడ్ ప్లస్ సెక్యూరిటీ' కల్పించారంటూ వ్యంగ్యంగా చిత్రీకరించిన వీడియో సోషల్ మీడియాలో వైరల్ అయింది. ఈ ఘటనపై తీవ్ర విమర్శలు రావడంతో విమానాశ్రయ అధికారులు వెంటనే స్పందించి దిద్దుబాటు చర్యలు చేపట్టారు.

అసలేం జరిగిందంటే..
దీపక్ సమల్ అనే ట్రావెల్ బ్లాగర్ ఇటీవల ముంబై అంతర్జాతీయ విమానాశ్రయంలోని ఒక కౌంటర్ వద్ద ఫారం నింపాల్సి వచ్చింది. అక్కడ పెన్నుకు బదులుగా ఒక రీఫిల్‌ను తాడుతో కట్టి ఉంచడం చూసి ఆయన ఆశ్చర్యపోయారు. ఈ దృశ్యాన్ని వీడియో తీసి ఇన్‌స్టాగ్రామ్‌లో పోస్ట్ చేశారు. "ఇది ముంబై అంతర్జాతీయ విమానాశ్రయం. ఇక్కడ ఫారం నింపాలి. కానీ ఆసక్తికరమైన విషయం ఏమిటంటే, ఇక్కడున్న ఈ రీఫిల్‌కు చాలా భద్రత ఉంది" అని వీడియోలో వ్యాఖ్యానించారు.

"ఇంత పెద్ద అంతర్జాతీయ విమానాశ్రయంలో కనీసం ఒక పెన్ను కూడా పెట్టలేని పరిస్థితా? ఏదేమైనా, వారి పరువు కాపాడటానికి నేను నా పెన్నును ఇక్కడ వదిలి వెళ్తున్నాను. దీనివల్ల తర్వాత వచ్చే అంతర్జాతీయ ప్రయాణికులైనా ఇబ్బంది పడకుండా ఉంటారు" అంటూ తన వద్ద ఉన్న ఒక పెన్నును ఆ కౌంటర్‌పై పెట్టి వెళ్లిపోయారు. ఈ వీడియోకు "అంతర్జాతీయ ముంబై ఎయిర్‌పోర్ట్‌లో ఈ పెన్నుకు జెడ్ ప్లస్ సెక్యూరిటీ" అనే టెక్స్ట్ జోడించారు.

దేశ ప్రతిష్ఠ‌కు సంబంధించిన విషయం
ఈ పోస్ట్‌కు జతచేసిన క్యాప్షన్‌లో ఆయన మరింత లోతైన విషయాన్ని ప్రస్తావించారు. "ఇది కేవలం ఒక పెన్ను కాదు - ఇది భారతదేశ ప్రతిష్ఠ‌కు సంబంధించిన విషయం. అంతర్జాతీయ ప్రయాణికులు ఇలాంటి చిన్న విషయాలనే ఎక్కువగా గమనిస్తారు. విమానాశ్రయాలు ఒక దేశంపై సందర్శకులకు మొదటి అభిప్రాయాన్ని కలిగిస్తాయి. మన సేవా ప్రమాణాలు, ఆతిథ్యం, చిన్న విషయాలపై మనకున్న శ్రద్ధను ఇవి ప్రతిబింబిస్తాయి. ప్రపంచ స్థాయి దేశం, ప్రపంచ స్థాయి ప్రాథమిక సౌకర్యాలపైనే నిర్మితమవుతుంది" అని ఆయన పేర్కొన్నారు.

వైరల్ కావడంతో స్పందించిన అధికారులు
ఈ వీడియోను ప్రముఖ 'ఎక్స్' (ట్విట్టర్) ఖాతా ఒకటి రీపోస్ట్ చేయడంతో ఇది క్షణాల్లో సోషల్ మీడియాలో వైరల్ అయింది. నెటిజన్లు విమానాశ్రయ అధికారుల తీరుపై తీవ్ర విమర్శలు గుప్పించారు. దేశానికి ముఖద్వారం లాంటి అంతర్జాతీయ విమానాశ్రయంలో ఇలాంటి నిర్లక్ష్యం తగదని పలువురు అభిప్రాయపడ్డారు.

విషయం తీవ్రతను గ్రహించిన ముంబై విమానాశ్రయ అధికారులు వెంటనే స్పందించారు. ఆ పోస్ట్‌కు బదులిస్తూ.. "మీరు ప్రస్తావించిన వస్తువును కౌంటర్ నుంచి తొలగించాం. భవిష్యత్తులో ఇలాంటి ఘటనలు పునరావృతం కాకుండా అవసరమైన దిద్దుబాటు చర్యలు తీసుకుంటున్నాం. ఇలాంటి ఫీడ్‌బ్యాక్ మా సేవా ప్రమాణాలను ఉన్నతంగా నిర్వహించుకోవడానికి సహాయపడుతుంది" అని తెలిపారు. చూడటానికి చిన్న విషయమే అయినా, అంతర్జాతీయ వేదికలపై దేశ ప్రతిష్ఠ‌ను కాపాడుకోవడంలో ప్రతి అంశం కీలకమని ఈ సంఘటన నిరూపించింది.