చిరు-బాబీ సినిమా.. హైదరాబాద్‌లో చిత్రీకరణ ప్రారంభం

మెగాస్టార్ చిరంజీవి హీరోగా, దర్శకుడు బాబీ కొల్లి తెరకెక్కిస్తున్న యాక్షన్ ఎంటర్‌టైనర్ Mega158 చిత్రీకరణ శరవేగంగా సాగుతోంది. ఇటీవలే పొల్లాచ్చిలో తొలి షెడ్యూల్ పూర్తి చేసుకున్న ఈ సినిమా, సోమవారం నుంచి హైదరాబాద్‌లో రెండో షెడ్యూల్ షురూ చేసింది. ఈ విషయాన్ని నిర్మాణ సంస్థ కేవీఎన్ ప్రొడక్షన్స్ సోషల్ మీడియా ద్వారా అధికారికంగా ప్రకటించింది.

"పొల్లాచ్చిలోని అందమైన లొకేషన్ల నుంచి మరో భారీ ఘట్టంలోకి అడుగుపెట్టాం. MEGA158 రెండో షెడ్యూల్ హైదరాబాద్‌లో శరవేగంగా జరుగుతోంది. మెగాస్టార్ ప్రతి షాట్‌ను అద్భుతంగా, ప్రతి సన్నివేశాన్ని ఓ వేడుకలా మలుస్తున్నారు" అని చిత్రబృందం ఎక్స్‌లో పోస్ట్ చేసింది. ఈ చిత్రానికి 'ది బ్లడీ బెంచ్‌మార్క్' అనే ట్యాగ్‌లైన్‌ను కూడా జోడించారు.

గత వారమే ఈ సినిమా తొలి షెడ్యూల్ తమిళనాడులోని పొల్లాచ్చిలో పూర్తయిన సంగతి తెలిసిందే. ఈ షెడ్యూల్‌లో చిరంజీవితో పాటు ప్రధాన తారాగణంపై కీలక సన్నివేశాలను చిత్రీకరించారు. ఇటీవలే ఈ చిత్రంలోకి నటి అనసూర రాజన్‌ను స్వాగతించారు.

విజయవంతమైన 'వాల్తేరు వీరయ్య' తర్వాత చిరంజీవి, బాబీ కొల్లి కాంబినేషన్‌లో వస్తున్న రెండో సినిమా ఇది. ఈ చిత్రానికి ఎస్.ఎస్. థమన్ సంగీతం అందిస్తుండగా, 'జైలర్' ఫేమ్ విజయ్ కార్తీక్ కన్నన్ సినిమాటోగ్రాఫర్‌గా పనిచేస్తున్నారు. కేవీఎన్ ప్రొడక్షన్స్ పతాకంపై వెంకట్ కె నారాయణ ఈ చిత్రాన్ని నిర్మిస్తున్నారు. సినిమా కోసం చిరంజీవి జిమ్‌లో కసరత్తులు చేస్తున్న వీడియో ఇటీవలే విడుదలై అభిమానుల్లో ఆసక్తిని పెంచింది.