బొల్లా బ్రహ్మనాయుడిపై మరో కేసు.. వివరాలు ఇవిగో!

వైఎస్సార్ కాంగ్రెస్ పార్టీ మాజీ ఎమ్మెల్యే బొల్లా బ్రహ్మనాయుడు మరోసారి వివాదంలో చిక్కుకున్నారు. పల్నాడు జిల్లా వినుకొండలో ముందస్తు అనుమతి లేకుండా ర్యాలీ నిర్వహించి, ట్రాఫిక్‌కు అంతరాయం కలిగించారన్న ఆరోపణలతో పోలీసులు ఆయనపై కేసు నమోదు చేశారు.

వివరాల్లోకి వెళితే, జూన్ 20వ తేదీన బొల్లా బ్రహ్మనాయుడు తన అనుచరులతో కలిసి నరసరావుపేట నుంచి వినుకొండకు భారీ కాన్వాయ్‌తో బయలుదేరారు. ఈ క్రమంలో వినుకొండ పట్టణంలో ట్రాఫిక్‌కు తీవ్ర అంతరాయం ఏర్పడింది. దీంతో రంగంలోకి దిగిన టౌన్ సీఐ ప్రభాకర్ రావు, కాన్వాయ్‌ను అడ్డుకున్నారు. ఈ సమయంలో పోలీసులకు, వైసీపీ కార్యకర్తలకు మధ్య స్వల్ప వాగ్వాదం చోటుచేసుకుంది. అనంతరం పోలీసులు కాన్వాయ్‌ను బ్రాహ్మణపల్లి రోడ్డు మీదుగా మళ్లించారు. ఆ తర్వాత బొల్లా వినుకొండలో జరిగిన ఓ సభలో పాల్గొన్నారు.

తెలంగాణలోని రంగారెడ్డి జిల్లాలో నమోదైన భూకబ్జా కేసులో కొద్ది రోజుల క్రితమే ఆయన బెయిల్‌పై విడుదలయ్యారు. గండిపేట పరిధిలో నకిలీ పత్రాలతో ప్రభుత్వ భూమిని ఆక్రమించేందుకు కుట్ర పన్నారన్న ఆరోపణలపై సైబరాబాద్ పోలీసులు ఆయన్ను తమిళనాడులోని కాంచీపురంలో అరెస్ట్ చేశారు. ఆ కేసులో బెయిల్ పొందిన కొద్ది రోజులకే ఇప్పుడు వినుకొండలో అనుమతి లేని ర్యాలీ నిర్వహించి మరో కేసులో చిక్కుకున్నారు.

2019 నుంచి 2024 వరకు వినుకొండ ఎమ్మెల్యేగా పనిచేసిన బ్రహ్మనాయుడు, ఎన్నికల్లో ఓటమి తర్వాత స్థానిక రాజకీయాల్లో చురుగ్గా ఉంటున్నారు. ఈ తాజా ఘటనపై పోలీసులు కేసు నమోదు చేసి దర్యాప్తు ప్రారంభించారు.