ఆన్‌లైన్ గేమింగ్ వ్యసనం.. కుటుంబంపై యువకుడి కిరాతకం.. ఇద్ద‌రి మృతి

కర్ణాటకలోని కొప్పల్ జిల్లాలో ఒక కుటుంబంలో తీవ్ర విషాదం చోటుచేసుకుంది. కన్నకొడుకే కాలయముడై తల్లిదండ్రులు, సోదరిపై కత్తితో దాడికి పాల్పడ్డాడు. ఈ కిరాతక ఘటనలో ఇద్దరు మరణించగా, మరొకరు ప్రాణాలతో పోరాడుతున్నారు. ఆన్‌లైన్ గేమింగ్ వ్యసనమే ఈ దారుణానికి కారణమై ఉండొచ్చని పోలీసులు ప్రాథమికంగా అనుమానిస్తున్నారు.

పోలీసులు వెల్లడించిన వివరాల ప్రకారం కొప్పల్ జిల్లాకు చెందిన సాయి నాయుడు (18) అనే యువకుడు తన తండ్రి యంకన్న నాయుడు (48), తల్లి సౌజన్య, సోదరి ప్రగతి (20)పై సోమవారం కత్తితో విచక్షణారహితంగా దాడి చేశాడు. ఈ ఘటనలో తీవ్రంగా గాయపడిన ప్రగతి అక్కడికక్కడే ప్రాణాలు కోల్పోయింది. తీవ్ర గాయాలపాలైన మిగతా వారిని వెంటనే ఆసుపత్రికి తరలించారు. అయితే, బళ్లారిలోని బీమ్స్ (బీఐఎంఎస్‌) ఆసుపత్రిలో చికిత్స పొందుతూ తండ్రి యంకన్న నాయుడు కూడా మరణించారు. తల్లి సౌజన్య పరిస్థితి అత్యంత విషమంగా ఉందని, ఆమెకు ఐసీయూలో చికిత్స కొనసాగుతోందని వైద్యులు తెలిపారు.

కుటుంబ సభ్యులపై దాడి చేసిన అనంతరం నిందితుడు సాయి నాయుడు కూడా తనను తాను కత్తితో పొడుచుకుని ఆత్మహత్యకు యత్నించాడు. ప్రస్తుతం అతడు కూడా అదే ఆసుపత్రిలో చికిత్స పొందుతున్నాడు. కొప్పల్ జిల్లా పోలీసులు ఆసుపత్రికి చేరుకుని అతడిని విచారిస్తున్నారు.

గంగావతి పోలీసులు ఘటనా స్థలాన్ని పరిశీలించి, కేసు నమోదు చేసి దర్యాప్తు ప్రారంభించారు. ప్రాథమిక విచారణలో సాయి నాయుడు ఆన్‌లైన్ గేమింగ్‌కు బానిసైనట్లు తేలింది. అయితే, ఈ దాడికి గేమింగ్ వ్యసనమే ప్రత్యక్ష కారణమా? లేక కుటుంబంలో ఇతర గొడవలు ఏమైనా ఉన్నాయా? అనే కోణంలో పోలీసులు లోతుగా దర్యాప్తు చేస్తున్నారు. ఒకవైపు తల్లి ప్రాణాలతో పోరాడుతుండగా, ఈ దారుణ ఘటన వెనుక ఉన్న అసలు కారణాలను నిగ్గుతేల్చే పనిలో పోలీసులు నిమగ్నమయ్యారు. ఈ సంఘటన స్థానికంగా తీవ్ర కలకలం రేపింది.