నార్వే చెస్ టోర్నమెంట్‌లో ప్రజ్ఞానంద సంచలనం.. తొలి భారతీయుడిగా సరికొత్త చరిత్ర!

భారత యువ గ్రాండ్‌మాస్టర్ ఆర్ ప్రజ్ఞానంద అంతర్జాతీయ చెస్ ప్రపంచంలో సరికొత్త చరిత్ర లిఖించాడు. ఓస్లో వేదికగా జరిగిన ప్రతిష్ఠాత్మక 'నార్వే చెస్ 2026' టైటిల్‌ను కైవసం చేసుకుని, ఈ ఘనత సాధించిన మొట్టమొదటి భారతీయ క్రీడాకారుడిగా రికార్డు సృష్టించాడు. శుక్రవారం (5న) జరిగిన హోరాహోరీ ఆఖరి రౌండ్‌లో జర్మనీ క్రీడాకారుడు విన్సెంట్ కీమర్‌పై క్లాసికల్ విజయం సాధించి చాంపియన్ అయ్యాడు. టోర్నమెంట్ మధ్యలో ఎదురుదెబ్బలు తగిలినా, పట్టు వదలకుండా పోరాడి టైటిల్ నెగ్గడం ప్రగ్‌ మానసిక దృఢత్వానికి నిదర్శనంగా నిలిచింది.

నార్వే చెస్ పాయింట్ల విధానం ప్రకారం.. ప్రజ్ఞానంద మొత్తం 18 పాయింట్లతో అగ్రస్థానంలో నిలవగా, అమెరికాకు చెందిన వెస్లీ సో 17 పాయింట్లతో రెండో స్థానాన్ని, ఫ్రాన్స్‌కు చెందిన అలీరెజా ఫిరౌజ్జా 15.5 పాయింట్లతో మూడో స్థానాన్ని దక్కించుకున్నారు. ప్రపంచ ఛాంపియన్ డి గుకేశ్ 8 పాయింట్లతో వెనుకబడగా, ఆతిథ్య నార్వే స్టార్ మాగ్నస్ కార్ల్‌సన్ 13 పాయింట్లతో టోర్నీని ముగించాడు.

 అద్భుత పునరాగమనం 
10 రౌండ్ల ఈ మెగా టోర్నమెంట్‌లో ఆరో రౌండ్ ముగిసేసరికి ప్రజ్ఞానంద వరుస ఓటములతో పాయింట్ల పట్టికలో ఆఖరి స్థానానికి పడిపోయాడు. గుకేశ్ చేతిలో కూడా ఓటమి చవిచూశాడు. అయితే, టోర్నీ మలిదశలో ప్రగ్‌ ఊహించని రీతిలో చెలరేగిపోయాడు. వరుసగా నాలుగు క్లాసికల్ గేముల్లో ప్రత్యర్థులను చిత్తు చేస్తూ టైటిల్ రేసులోకి దూసుకొచ్చాడు. అలిరెజా ఫిరౌజ్జా, మాగ్నస్ కార్ల్‌సన్, ఆ తర్వాత ప్రపంచ ఛాంపియన్ గుకేశ్‌లను వరుసగా ఓడిస్తూ ప్రత్యర్థులకు ముచ్చెమటలు పట్టించాడు.

ముఖ్యంగా, ప్రపంచ నంబర్ వన్ మాగ్నస్ కార్ల్‌సన్‌పై ఒకే టోర్నమెంట్‌లో అటు తెల్ల రంగు పావులతో (White), ఇటు నల్ల రంగు పావులతో (Black) క్లాసికల్ విజయం సాధించడం ఒక అరుదైన రికార్డు. గతంలో భారత లెజెండ్ విశ్వనాథన్ ఆనంద్ మాత్రమే కార్ల్‌సన్‌పై ఒకే టోర్నీలో రెండు క్లాసికల్ విజయాలు సాధించగా, ఇప్పుడు ఆ రికార్డును ప్రగ్‌ సమం చేశాడు. "మూడు రోజుల క్రితం నేను చివరి స్థానం కోసం పోరాడుతున్నాను, కానీ ఇప్పుడు టైటిల్ గెలిచే అవకాశం రావడం చాలా ఆనందంగా ఉంది" అని తొమ్మిదో రౌండ్ తర్వాత ప్రగ్‌ పేర్కొన్నాడు.

భారత చెస్ నయా శకం
ఈ అద్భుత విజయం భారత చెస్ ఎదుగుదలలో మరో మైలురాయిగా నిలిచింది. కాండిడేట్స్ టోర్నీకి ఇప్పటికే అర్హత సాధించిన 20 ఏళ్ల ప్రజ్ఞానంద, ఈ సూపర్ టోర్నీ విజయంతో ప్రపంచ అత్యుత్తమ ఎలైట్ ఆటగాళ్లలో ఒకడిగా తన స్థానాన్ని మరింత సుస్థిరం చేసుకున్నాడు. ఇక మహిళల విభాగంలో కజకిస్థాన్‌కు చెందిన బిబిసారా అసౌబయేవా ఒక రౌండ్ మిగిలి ఉండగానే నార్వే చెస్ మహిళల టైటిల్‌ను కైవసం చేసుకుంది.