షుగర్ ఉన్నవాళ్లు పరగడుపున పండ్లు తినకూడదా?

చాలామందికి ఉదయాన్నే అల్పాహారానికి బదులు పండ్లు తినే అలవాటు ఉంటుంది. అయితే, పరగడుపున పండ్లు తినడం ఆరోగ్యానికి మంచిదేనా? ముఖ్యంగా, మధుమేహం, ప్రీ-డయాబెటిస్ సమస్యలు ఉన్నవారిలో ఇది రక్తంలో చక్కెర స్థాయిలను వేగంగా పెంచుతుందా? అనే సందేహాలు వ్యక్తమవుతున్నాయి. ఆరోగ్య నిపుణులు దీనిపై స్పష్టతనిస్తున్నారు.

పండ్లలో ఫ్రక్టోజ్ రూపంలో సహజ చక్కెరలు ఉంటాయి. శరీరం దీనిని గ్లూకోజ్‌గా మారుస్తుంది. పరగడుపున పండ్లను మాత్రమే తిన్నప్పుడు, వాటిలోని చక్కెరలు వేగంగా రక్తంలో కలిసిపోతాయి. దీనివల్ల బ్లడ్ షుగర్ లెవెల్స్ ఒక్కసారిగా పెరిగే (స్పైక్) అవకాశం ఉందని నిపుణులు వివరిస్తున్నారు. ముఖ్యంగా ఇన్సులిన్ రెసిస్టెన్స్, మధుమేహం ముప్పు ఉన్నవారిలో ఈ ప్రభావం ఎక్కువగా కనిపించవచ్చు.

ముఖ్యంగా కొన్ని పండ్ల విషయంలో జాగ్రత్త వహించాలని డైటీషియన్లు సూచిస్తున్నారు. పుచ్చకాయ, బాగా పండిన అరటిపండు, పైనాపిల్ వంటి అధిక గ్లైసెమిక్ ఇండెక్స్ ఉన్న పండ్లను తింటే షుగర్ వేగంగా పెరగొచ్చు. అదే బెర్రీలు, యాపిల్స్, బేరి వంటి పండ్లు కొంత మేర సురక్షితం.

ఆరోగ్యవంతులు పరగడుపున మితంగా పండ్లు తినడం వల్ల పెద్దగా సమస్య ఉండదు. కానీ, మధుమేహం ఉన్నవారు పండ్లను.. యోగర్ట్, నట్స్ వంటి ప్రొటీన్లు లేదా ఆరోగ్యకరమైన కొవ్వులు ఉన్న ఆహారాలతో కలిపి తీసుకుంటే షుగర్ స్పైక్‌ను నివారించవచ్చు. మీ ఆరోగ్య పరిస్థితిని బట్టి సరైన సలహా కోసం వైద్యుడిని లేదా డైటీషియన్‌ను సంప్రదించడం ఉత్తమం.