ఒకే ఒక్క జోక్ వీడియో.. దుబాయ్లో 47 రోజులు జైలుపాలైన ఇండియన్ కమెడియన్!
- రీల్ వీడియో వల్ల 47 రోజులు దుబాయ్ జైల్లో కమెడియన్
- గూగుల్ మ్యాప్స్ జోక్ను సీరియస్గా తీసుకున్న పోలీసులు
- జాతీయ భద్రతకు ముప్పని భావించి నిర్బంధం
- మే 5న భారత్కు డిపోర్ట్ అయిన యష్ భరద్వాజ్
- బెంగళూరులో కొత్త జీవితం ప్రారంభించేందుకు సిద్ధం
అమెరికా-ఇరాన్ ఉద్రిక్తతలు నడుస్తున్న సమయంలో అక్కడ గూగుల్ మ్యాప్స్ (Google Maps) సరిగ్గా పనిచేయడం లేదంటూ యష్ భరద్వాజ్ ఒక చిన్న కామెడీ రీల్ చేసి సోషల్ మీడియాలో పోస్ట్ చేశారు. అయితే, అది ఒక హాస్య వీడియో అయినప్పటికీ, దుబాయ్ అధికారులు మాత్రం దానిని దేశ భద్రతకు ముప్పుగా (National security concern) భావించారు. ఫలితంగా ఆయనను అదుపులోకి తీసుకుని, దాదాపు 47 రోజుల పాటు డిటెన్షన్ సెంటర్లో ఉంచారు. వారాల తరబడి సాగిన నిర్బంధం తర్వాత, ఎట్టకేలకు మే 5న ఆయనను అక్కడి నుండి ఇండియాకు పంపించి వేశారు.
ఈ ఊహించని పరిణామం తనతో పాటు తన కుటుంబానికి కూడా శారీరకంగా, మానసికంగా, ఆర్థికంగా ఎంతో భారాన్ని, వేదనను మిగిల్చిందని యష్ భరద్వాజ్ ఆవేదన వ్యక్తం చేశారు. ప్రస్తుతం ముంబైలో ఉంటూ నెమ్మదిగా తన సాధారణ జీవితాన్ని పునర్నిర్మించుకునే ప్రయత్నం చేస్తున్నారు. భారత్కు తిరిగి వచ్చిన వెంటనే మళ్లీ స్టేజ్ ఎక్కి ప్రదర్శనలు ఇవ్వడం ప్రారంభించానని, అది తనకు కొంత ఉపశమనాన్ని ఇచ్చిందని తెలిపారు. ముంబై నగరం ఈ క్లిష్ట సమయంలో తనను ఎంతో ఆదరించిందని ఆయన పేర్కొన్నారు.
ప్రస్తుతం ఈ కష్టాల నుంచి బయటపడి ముందుకు సాగాలని భావిస్తున్న యష్.. తన జీవితంలో కొత్త అధ్యాయాన్ని ప్రారంభించడానికి బెంగళూరు నగరానికి మారేందుకు సిద్ధమవుతున్నారు. దాదాపు 16 ఏళ్ల క్రితం స్టాండప్ కామెడీ పట్ల తనకు తొలిసారిగా ప్రేమ చిగురించింది బెంగళూరులోనేనని, అందుకే కొన్ని వారాల పాటు అక్కడ గడపాలని నిర్ణయించుకున్నట్లు తెలిపారు. కొన్నిసార్లు మనం వేసే చిన్న జోక్ కూడా ఊహించని పరిణామాలకు దారితీస్తుందనే చేదు నిజాన్ని తెలుసుకున్న ఈ కమెడియన్.. ప్రస్తుతం వాటన్నింటినీ మర్చిపోయి మళ్లీ ప్రజలను నవ్వించడమే లక్ష్యంగా ముందుకు సాగుతున్నారు.
