ట్విషా శర్మ మృతి కేసు: మాజీ జడ్జికి హైకోర్టు షాక్.. ముందస్తు బెయిల్ రద్దు

కోడలు ట్విషా శర్మ అనుమానాస్పద మృతి కేసులో తీవ్ర ఆరోపణలు ఎదుర్కొంటున్న జిల్లా మాజీ జడ్జి గిరిబాలా సింగ్‌కు మధ్యప్రదేశ్ హైకోర్టులో గట్టి ఎదురుదెబ్బ తగిలింది. ఆమెకు కింది కోర్టు మంజూరు చేసిన ముందస్తు బెయిల్‌ను ఉన్నత న్యాయస్థానం బుధవారం రద్దు చేసింది. కేసు డైరీ, కీలక ఆధారాలను పరిగణనలోకి తీసుకోకుండానే సెషన్స్ కోర్టు బెయిల్ మంజూరు చేయడంపై హైకోర్టు తీవ్ర అసంతృప్తి వ్యక్తం చేసింది.

గిరిబాలా సింగ్ కోడలు ట్విషా శర్మ కట్నం వేధింపుల కారణంగా అనుమానాస్పద స్థితిలో మరణించారు. ఈ కేసులో నిందితురాలిగా ఉన్న గిరిబాలా సింగ్‌కు ఆమె వయసు, గత హోదాను దృష్టిలో ఉంచుకుని మే 15న భోపాల్ సెషన్స్ కోర్టు ముందస్తు బెయిల్ ఇచ్చింది. దీనిని సవాలు చేస్తూ దాఖలైన పిటిషన్‌పై జస్టిస్ దేవనారాయణ మిశ్రా నేతృత్వంలోని ధర్మాసనం విచారణ జరిపింది.

కేస్ డైరీ, సాక్షుల వాంగ్మూలాలు, వాట్సాప్ సంభాషణలు నిందితురాలి ప్రమేయాన్ని సూచిస్తున్నా, కింది కోర్టు వాటిని విస్మరించిందని హైకోర్టు పేర్కొంది. కట్నం చావులు సమాజానికి పెనుశాపమని, చట్టం ముందు అందరూ సమానమేనని, హోదా ఆధారంగా నేర తీవ్రతను తగ్గించలేమని స్పష్టం చేసింది.

తాజా తీర్పుతో గిరిబాలా సింగ్‌ను అరెస్ట్ చేసేందుకు కేంద్ర దర్యాప్తు సంస్థ (CBI)కి మార్గం సుగమమైంది. ఆమెను ఏ క్షణమైనా అదుపులోకి తీసుకునే అవకాశం ఉంది. కాగా, ఈ కేసులో ప్రధాన నిందితుడు, ట్విషా భర్త అయిన సమర్థ్ సింగ్ మే 29 వరకు సీబీఐ కస్టడీలో ఉన్నారు.