ఇన్‌స్టా నుంచి 200 పోస్టులు డిలీట్.. కోహ్లీతో రీల్ కూడా మాయం.. అర్ష్‌దీప్‌కు ఏమైంది?

టీమిండియా యువ పేసర్, పంజాబ్ కింగ్స్ బౌలర్ అర్ష్‌దీప్ సింగ్ తన ఇన్‌స్టాగ్రామ్ ఖాతా నుంచి దాదాపు 200 పోస్టులు, రీల్స్‌ను ఒక్కసారిగా తొలగించి అభిమానులకు షాకిచ్చాడు. ఈ డిజిటల్ ప్రక్షాళన తర్వాత అతని ప్రొఫైల్‌లో కేవలం 44 పోస్టులు మాత్రమే మిగిలాయి. వీటిలో ఎక్కువ శాతం కుటుంబ చిత్రాలు, వాణిజ్య ప్రకటనలు, పెయిడ్ పార్ట్‌నర్‌షిప్ పోస్టులే ఉన్నాయి.

ఛాంపియన్స్ ట్రోఫీ 2025 వేడుకల సందర్భంగా విరాట్ కోహ్లీతో చేసిన వైరల్ రీల్‌తో పాటు అనేక వ్యక్తిగత పోస్టులు కూడా అదృశ్యమయ్యాయి. అయితే, ఐపీఎల్ ఫ్రాంచైజీ పంజాబ్ కింగ్స్‌కు సంబంధించిన అన్ని పోస్టులను తొలగించాడంటూ వచ్చిన వార్తల్లో నిజం లేదు. పంజాబ్ జట్టు ఫొటోతో ఉన్న 'సబర్. షుకర్. పంజాబ్' అనే క్యాప్షన్ గల పోస్ట్ ఇంకా కనిపిస్తోంది. అయితే, ఈ చర్య వెనుక వ్యక్తిగత రీబ్రాండింగ్ ప్రయత్నం ఉందా? లేక ఇటీవలి వివాదాల నుంచి దూరంగా ఉండేందుకే ఇలా చేశాడా? అనే దానిపై తీవ్రమైన చర్చ జరుగుతోంది.

ఐపీఎల్ 2026 సీజన్‌లో 27 ఏళ్ల అర్ష్‌దీప్ ప్రదర్శన అంత‌గా ఆక‌ట్టుకోలేదు. 14 మ్యాచ్‌ల్లో 14 వికెట్లతో పంజాబ్ తరఫున టాప్ వికెట్ టేకర్‌గా నిలిచినప్పటికీ, జట్టు ప్లేఆఫ్స్‌కు అర్హత సాధించలేకపోయింది. ఇదిలా ఉంటే.. ముంబై ఇండియన్స్ బ్యాటర్ తిలక్ వర్మను ఉద్దేశించి జాతి వివక్ష వ్యాఖ్యలు చేశాడనే ఆరోపణలు తీవ్ర దుమారం రేపాయి. అలాగే, అతని వ్లాగ్‌లో యుజ్వేంద్ర చాహల్ ఈ-సిగరెట్ తాగుతున్నట్లు కనిపించడం కూడా వివాదాస్పదమైంది. ఈ పరిణామాల తర్వాతే అతను సోషల్ మీడియాకు దూరంగా ఉండాలని నిర్ణయించుకున్నట్లు విశ్లేషకులు భావిస్తున్నారు.