మనం చెత్త సినిమాలు తీస్తున్నాం.. ప్రేక్షకులు థియేటర్లకు ఎందుకు వస్తారు?: రాహుల్ రామకృష్ణ

తెలుగు చలనచిత్ర పరిశ్రమలో తనదైన నటనతోనే కాకుండా, సామాజిక అంశాలపై స్పందించే తీరుతోనూ ప్రత్యేక గుర్తింపు తెచ్చుకున్న నటుడు రాహుల్ రామకృష్ణ. ఆయన ఎప్పుడూ ఉన్నది ఉన్నట్లుగా, నిక్కచ్చిగా మాట్లాడతారనే పేరుంది. ఈ క్రమంలోనే తాజాగా సినిమా పరిశ్రమలో మారుతున్న పరిస్థితులు, ప్రేక్షకుల అభిరుచిపై ఆయన చేసిన ట్వీట్లు సోషల్ మీడియాలో సంచలనంగా మారాయి. 

ముఖ్యంగా సినిమాల నాణ్యతను ప్రస్తావిస్తూ, థియేటర్లు ఖాళీగా ఉంటున్నాయని ఆందోళన చెందడం కంటే, మనం ఎంత చెత్త సినిమాలు తీస్తున్నామో ఒకసారి ఆత్మవిమర్శ చేసుకోవాలని మేకర్స్‌కు చురకలు అంటించారు. నేటి కాలంలో ఒక సామాన్యుడు ట్రాఫిక్, ఎండలు, పెట్రోల్ ధరలు, పార్కింగ్ వంటి సమస్యలను దాటుకుని భారీ ఖర్చుతో థియేటర్‌కు వస్తున్నాడని... అక్కడ కూడా టికెట్ రేట్లు, స్నాక్స్ ధరల భారాన్ని మోస్తూ తీరా సినిమా చూస్తే అది నాసిరకంగా ఉంటోందని ఆయన ఆవేదన వ్యక్తం చేశారు. ఇంతా చేసి ప్రేక్షకుడికి నాణ్యమైన వినోదాన్ని అందించకపోతే వారు మళ్లీ థియేటర్‌కు ఎందుకు వస్తారని ఆయన ప్రశ్నించారు.

సినిమా మేకింగ్ గురించి ప్రేక్షకులకు ఏమీ తెలియదని అనుకోవడం మేకర్స్ భ్రమ అని, డిజిటలైజేషన్ పెరిగిన ఈ కాలంలో ప్రతి ఒక్కరికీ టెక్నికల్ అంశాలపై పూర్తి అవగాహన ఉందని రాహుల్ స్పష్టం చేశారు. నేటి ప్రేక్షకులు ఏమాత్రం అమాయకులు కాదని, పాతకాలపు కథలు, అహంకారంతో కూడిన మేకింగ్ పద్ధతులను వీడితేనే థియేటర్ల మనుగడ సాధ్యమని ఆయన హెచ్చరించారు. ఓటీటీల కాలంలో కేవలం గొప్ప కంటెంట్ ఉంటేనే జనం బయటకు వస్తారనే ఆయన మాటలకు నెటిజన్లు పెద్ద ఎత్తున మద్దతు తెలుపుతున్నారు.