ఏపీ ప్రభుత్వ సలహాదారు వేమూరు రవికుమార్ తనయుడి వివాహ వేడుకకు హాజరైన మంత్రి నారా లోకేష్

రాష్ట్ర ఐటీ, విద్యాశాఖ మంత్రి నారా లోకేష్ శనివారం విజయవాడలో పర్యటించారు. ఇంద్రకీలాద్రిపై కొలువైన శ్రీ కనకదుర్గ అమ్మవారిని దర్శించుకుని ప్రత్యేక పూజలు నిర్వహించారు. అనంతరం ఏపీ ప్రభుత్వ సలహాదారు, ఏపీఎన్ఆర్టీ సొసైటీ అధ్యక్షుడు డాక్టర్ వేమూరు రవికుమార్ కుమారుడి వివాహ వేడుకలో పాల్గొన్నారు.

శనివారం ఉదయం ఇంద్రకీలాద్రికి చేరుకున్న మంత్రి లోకేష్‌కు దేవస్థానం అధికారులు ఘన స్వాగతం పలికారు. ఆలయ కమిషనర్ రామచంద్ర మోహన్, ఈవో సీనా నాయక్, బోర్డు ఛైర్మన్ బోరా రాధాకృష్ణ తదితరులు మంత్రికి పూర్ణకుంభంతో స్వాగతం పలికారు. అమ్మవారి దర్శనానంతరం వేదపండితులు లోకేష్‌కు వేదాశీర్వచనం అందించారు. అధికారులు అమ్మవారి చిత్రపటాన్ని, తీర్థప్రసాదాలను అందజేశారు.

ఆ తర్వాత ఆలయ ప్రాంగణంలోనే జరిగిన వేమూరు రవి కుమార్ కుమారుడు కిరణ్, పుష్పలతల వివాహ వేడుకకు హాజరయ్యారు. ఈ సందర్భంగా నూతన వధూవరులను ఆశీర్వదించారు. తన పర్యటనపై మంత్రి లోకేష్ స్పందిస్తూ, అమ్మవారిని దర్శించుకున్న అనంతరం వివాహ వేడుకలో పాల్గొని నూతన దంపతులను ఆశీర్వదించినట్లు తెలిపారు. ఈ సందర్భంగా ఆలయ అధికారులతో మాట్లాడిన మంత్రి, భక్తులకు ఎలాంటి అసౌకర్యం కలగకుండా చర్యలు తీసుకోవాలని సూచించారు.