తమిళనాడు రాజకీయాలపై డీకే శివకుమార్ హాట్ కామెంట్స్

నటుడు విజయ్ నేతృత్వంలోని ‘తమిళగ వెట్రి కళగం’ పార్టీకి ప్రభుత్వ ఏర్పాటుకు అవకాశం నిరాకరిస్తూ తమిళనాడు గవర్నర్ రాజేంద్ర విశ్వనాథ్ అర్లేకర్ తీసుకున్న నిర్ణయంపై కర్ణాటక డిప్యూటీ సీఎం డీకే శివకుమార్ తీవ్రంగా స్పందించారు. గవర్నర్ చర్య పూర్తిగా అప్రజాస్వామికమని ఆయన విమర్శించారు.

గురువారం బెంగళూరులోని విధాన సౌధలో విలేకరులతో మాట్లాడుతూ, సంఖ్యాబలం ఉన్న పార్టీని ప్రభుత్వ ఏర్పాటుకు ఆహ్వానించి, మెజారిటీ నిరూపించుకోకుండా అడ్డుకునే అధికారం గవర్నర్‌కు లేదని స్పష్టం చేశారు. "ప్రభుత్వ ఏర్పాటుకు విజయ్‌ను అడ్డుకునే అధికారం తమిళనాడు గవర్నర్‌కు ఏమాత్రం లేదు. ఆయన ప్రవర్తన సరైనది కాదు" అని డీకే శివకుమార్ అన్నారు.

గతంలో కర్ణాటక, జాతీయ స్థాయిలో జరిగిన రాజకీయ పరిణామాలను ఆయన గుర్తుచేశారు. కర్ణాటకలో మాజీ సీఎం యడియూరప్పను, కేంద్రంలో అటల్ బిహారీ వాజ్‌పేయిని అతిపెద్ద పార్టీలుగా ప్రభుత్వాలు ఏర్పాటు చేసేందుకు గవర్నర్లు, రాష్ట్రపతులు అవకాశం కల్పించారని తెలిపారు. మాజీ రాష్ట్రపతులు కేఆర్ నారాయణన్, ఏపీజే అబ్దుల్ కలాం కూడా ఇదే విధానాన్ని అనుసరించారని చెప్పారు. అదేవిధంగా, తమిళగ వెట్రి కళగం పార్టీకి కూడా మెజారిటీని నిరూపించుకునే అవకాశం ఇవ్వాలని ఆయన డిమాండ్ చేశారు.

"ఇదే ప్రజాస్వామ్యం. ఒక్క ఓటు కూడా మెజారిటీని లేదా మైనారిటీని నిర్ణయించగలదు. ఒకవేళ వారు మెజారిటీ నిరూపించుకోలేకపోతే, అప్పుడు తదుపరి ప్రత్యామ్నాయాన్ని పరిశీలించవచ్చు. రాష్ట్ర ప్రజల మనోభావాలను, వారి తీర్పును ప్రతి ఒక్కరూ గౌరవించాలి" అని శివకుమార్ హితవు పలికారు.