డ్రైవర్ లెస్ కారులో మీనా షికార్లు

ప్రముఖ నటి మీనా డ్రైవర్ లేని ట్యాక్సీలో ప్రయాణించి అందరినీ ఆశ్చర్యపరిచారు. ఈ ప్రయాణానికి సంబంధించిన వీడియోను ఆమె తన ఇన్‌స్టాగ్రామ్ ఖాతాలో పోస్ట్ చేయగా, అది ఇప్పుడు వైరల్‌గా మారింది. "మీకు నా డ్రైవర్‌ను పరిచయం చేయనా?" అని మీనా ప్రశ్నించడం... ఆ తర్వాత కెమెరాను డ్రైవర్ సీటు వైపు తిప్పగా, అది ఖాళీగా కనిపించడం... "ఇది డ్రైవర్‌లెస్ ట్యాక్సీ" అని ఆమె నవ్వుతూ చెప్పడం ఆ వీడియోలో చూడొచ్చు. "టెక్నాలజీని నమ్మి, ఈ దృశ్యాన్ని ఆస్వాదిస్తున్నాను" అని ఈ పోస్ట్‌కు ఆమె క్యాప్షన్ జోడించారు.

ఈ అనుభవం ఆమెకు ఎక్కడ ఎదురైందనేది స్పష్టంగా తెలియకపోయినా, ఇది అమెరికాలో జరిగి ఉంటుందని నెటిజన్లు కామెంట్లు పెడుతున్నారు.

ఇక సినిమాల విషయానికొస్తే, మీనా ప్రస్తుతం మలయాళ సూపర్‌స్టార్ మోహన్‌లాల్ సరసన 'దృశ్యం 3'లో నటిస్తున్నారు. జీతూ జోసెఫ్ దర్శకత్వం వహిస్తున్న ఈ చిత్రంపై భారీ అంచనాలున్నాయి. ఇటీవల విడుదలైన టీజర్ సినిమాపై ఆసక్తిని మరింత పెంచింది. జార్జ్ కుట్టి (మోహన్‌లాల్) పాత్ర ఈసారి భయంతో, ఆందోళనతో కనిపించడం గమనార్హం. "నా ఈ పోరాటం నేను పుట్టినప్పుడే మొదలైంది. ఇప్పుడు నాకు భయంగా ఉంది సార్" అని దేవుడితో చెప్పుకుంటున్న డైలాగ్‌లు ఉత్కంఠ రేపుతున్నాయి.

ఈ చిత్రానికి సెన్సార్ బోర్డు U/A 13+ సర్టిఫికేట్ జారీ చేసింది. వాస్తవానికి ఏప్రిల్ 2న విడుదల కావాల్సిన ఈ సినిమా, గల్ఫ్‌లో నెలకొన్న ఉద్రిక్త పరిస్థితుల కారణంగా వాయిదా పడింది. మే 21న ఈ చిత్రాన్ని విడుదల చేయనున్నట్లు నిర్మాతలు ప్రకటించారు.