ప్రసార భారతి చైర్మన్ గా బాలీవుడ్ లిరిక్ రైటర్ ప్రసూన్ జోషి నియామకం

బాలీవుడ్ లిరిక్ రైటర్, కమ్యూనికేషన్ నిపుణుడు ప్రసూన్ జోషి ప్రసార భారతి కొత్త చైర్మన్‌గా నియమితులయ్యారు. ఈ మేరకు శనివారం కేంద్ర సమాచార, ప్రసార మంత్రిత్వ శాఖ అధికారిక ప్రకటన విడుదల చేసింది. సాహిత్యం, ప్రకటనలు, సినిమా రంగాల్లో విశేష అనుభవం ఉన్న ప్రసూన్ జోషి నియామకం తక్షణమే అమల్లోకి వస్తుందని పేర్కొంది.

ప్రసూన్ జోషి నియామకంపై కేంద్ర సమాచార, ప్రసార శాఖ మంత్రి అశ్విని వైష్ణవ్ హర్షం వ్యక్తం చేశారు. "ప్రసూన్ జోషికి హృదయపూర్వక అభినందనలు. ఆయన ఒక అరుదైన సృజనశీలి. ఆయన మాటల్లో భారతీయత ఉట్టిపడుతుంది. ఆయన నాయకత్వంలో ప్రసార భారతి కొత్త ఉత్తేజంతో, లోతైన లక్ష్యంతో ముందుకు సాగుతుంది" అని మంత్రి ఆశాభావం వ్యక్తం చేశారు.

ఈ నియామకానికి ముందు, ప్రసూన్ జోషి 2017 ఆగస్టు నుంచి సెంట్రల్ బోర్డ్ ఆఫ్ ఫిల్మ్ సర్టిఫికేషన్ (సీబీఎఫ్ సీ) చైర్‌పర్సన్‌గా బాధ్యతలు నిర్వర్తించారు. గతంలో మెక్‌కాన్ వరల్డ్ గ్రూప్ ఇండియా సీఈఓగా, మెక్‌కాన్ ఆసియా పసిఫిక్ చైర్మన్‌గా కూడా ఆయన పనిచేశారు.

ప్రసూన్ జోషి తన కలంతో ఎన్నో అద్భుతమైన పాటలకు ప్రాణం పోశారు. 'రంగ్ దే బసంతి' చిత్రంలోని 'లూకా చుపీ', 'రూబరూ', 'మస్తీ కీ పాఠశాల' వంటి సూపర్ హిట్ గీతాలతో పాటు, 'తారే జమీన్ పర్'లోని 'మా', 'బమ్ బమ్ బోలే' వంటి భావోద్వేగభరితమైన పాటలను ఆయన రచించారు. అలాగే 'ఢిల్లీ-6'లోని 'మసకలి', 'భాగ్ మిల్కా భాగ్'లోని 'జిందా', 'ఓ రంగ్రేజ్', 'ఫనా'లోని 'చాంద్ సిఫారిష్', 'హమ్ తుమ్' టైటిల్ సాంగ్, 'గజిని'లోని 'గుజారిష్', 'నీర్జా', 'మణికర్ణిక' వంటి అనేక చిత్రాలకు ఆయన అందించిన సాహిత్యం ఎంతో ప్రాచుర్యం పొందింది.

 కాగా, 1990 ప్రత్యేక చట్టం ప్రకారం ఏర్పాటైన ప్రసార భారతి సంస్థ, 1997 నుంచి భారతదేశంలో ప్రభుత్వ రంగ ప్రసార సేవలను అందిస్తున్న స్వయంప్రతిపత్తి గల సంస్థగా పనిచేస్తోంది.