బెంగాల్‌ ఎన్నిక‌ల ఫ‌లితాల‌పై ఉత్కంఠ.. సౌరవ్ గంగూలీ ఏమన్నాడంటే?

పశ్చిమ బెంగాల్ అసెంబ్లీ ఎన్నికల ఫలితాలను ప్రధాని నరేంద్ర మోదీ, ముఖ్యమంత్రి మమతా బెనర్జీ, చివరికి బెంగాల్ ఆరాధ్య దైవం దుర్గామాత కూడా అంచనా వేయలేరని భారత క్రికెట్ జట్టు మాజీ కెప్టెన్ సౌరవ్ గంగూలీ ఆసక్తికర వ్యాఖ్యలు చేశాడు. ఎన్నికల ఫలితాలపై నెలకొన్న తీవ్ర ఉత్కంఠను గంగూలీ తనదైన శైలిలో అభివర్ణించాడు.

గంగూలీ విలేకరులతో మాట్లాడుతూ... 2026 బెంగాల్ ఎన్నికల్లో ఎవరు గెలుస్తారని అడిగిన ప్రశ్నకు స్పందించాడు. "ఇంతటి క్లిష్టమైన ప్రశ్నకు నేను ఎలా సమాధానం చెప్పగలను? సోమవారం బ్యాలెట్ బాక్సులు తెరిచినప్పుడే మనందరికీ సమాధానం తెలుస్తుంది" అని అన్నాడు. ఎన్నికల ఫలితాలు ఎంత అనూహ్యంగా ఉంటాయో చెబుతూ, "మమతా దీదీ, మోదీజీ, చివరికి దుర్గామాత కూడా ఫలితాలను అంచనా వేయలేరు" అని చమత్కరించాడు.

పశ్చిమ బెంగాల్‌లోని 294 అసెంబ్లీ స్థానాలకు ఏప్రిల్ 23, 29 తేదీల్లో రెండు విడతల్లో పోలింగ్ జరిగిన విష‌యం తెలిసిందే. కాగా, దక్షిణ 24 పరగణాల జిల్లాలోని రెండు నియోజకవర్గాల పరిధిలో 15 పోలింగ్ బూత్‌లలో ఎన్నికల సంఘం నేడు రీ-పోలింగ్ నిర్వహిస్తోంది. ఎల్లుండి ఓట్ల లెక్కింపు జరగనుంది.

అధికార తృణమూల్ కాంగ్రెస్, బీజేపీ మధ్య హోరాహోరీ పోరు జరగ్గా, చాలా వరకు ఎగ్జిట్ పోల్స్ బీజేపీకే విజయావకాశాలు ఉన్నట్లు అంచనా వేశాయి. కేంద్ర బలగాల పటిష్ఠ భద్రత నడుమ ఈ ఎన్నికలు జరిగాయి.