ఒక్క వారం రోజులు ఓపిక పట్టి ఉంటే.. ఆ అమ్మాయి బతికేది!

పదో తరగతి పరీక్షల్లో ఫెయిల్ అవుతాననే అనవసరపు భయం, తీవ్రమైన ఆందోళన ఓ నిండు ప్రాణాన్ని బలిగొంది. తీరా ఫలితాలు వచ్చాక చూస్తే, ఆ విద్యార్థిని అత్యుత్తమ మార్కులతో పాస్ అవ్వడం అందరినీ తీవ్ర దిగ్భ్రాంతికి గురిచేసింది. మెదక్ జిల్లాలో జరిగిన ఈ హృదయ విదారక ఘటన, విద్యార్థులపై పరీక్షల ఒత్తిడి ఏ స్థాయిలో ఉందో మరోసారి కళ్లకు కట్టింది.

అస‌లేం జ‌రిగిందంటే..! 
మెదక్ జిల్లా పాపన్నపేట మండలం పొడ్చన్‌పల్లి తండాకు చెందిన బానోత్ సాయిప్రియ (17) స్థానిక కొత్తపల్లి ఉన్నత పాఠశాలలో పదో తరగతి చదివింది. పరీక్షలు రాసిన నాటి నుంచి తాను సరిగా రాయలేదని, కచ్చితంగా ఫెయిల్ అవుతానని తీవ్ర ఆందోళన చెందింది. ఈ భయాన్ని జయించలేక, క్షణికావేశంలో ఈ నెల‌ 24న ఇంట్లో ఎవరూ లేని సమయంలో ఉరేసుకుని ఆత్మహత్యకు పాల్పడింది. కూతురు విగతజీవిగా కనిపించడంతో ఆ తల్లిదండ్రుల గుండెలు పగిలాయి.

బుధవారం తెలంగాణలో పదో తరగతి ఫలితాలు విడుదలయ్యాయి. సాయిప్రియ స్నేహితులు, ఉపాధ్యాయులు ఆమె హాల్‌టికెట్ నంబర్‌తో ఫలితాలను చూడగా, వారంతా దిగ్భ్రాంతికి గురయ్యారు. సాయిప్రియ కేవలం పాస్ అవడమే కాదు, ఏకంగా 480 మార్కులతో అత్యుత్తమ గ్రేడ్ సాధించింది. ఈ విషయం తెలియగానే ఆమె కుటుంబ సభ్యులు మరింతగా శోకసంద్రంలో మునిగిపోయారు. "ఆ ఒక్క వారం రోజులు ఓపిక పట్టి ఉంటే ఈరోజు మా కళ్ల ముందు ఆనందంగా ఉండేది కదా" అంటూ బంధువులు కన్నీరు పెట్టుకున్నారు.

కూతురు సాధించిన మార్కుల పత్రాన్ని చూస్తూ, "చదువుకోమని చెప్పాం కానీ, ఇలా ప్రాణాలు తీసుకోమని చెప్పలేదు కదా తల్లీ" అంటూ ఆ తల్లిదండ్రులు రోదించిన తీరు అక్కడున్న వారిని కంటతడి పెట్టించింది. ఈ విషాద ఘటనపై విద్యావేత్తలు స్పందిస్తూ, పరీక్షల్లో మార్కులే జీవితం కాదని, ఓటమి ఎదురైనా నిలదొక్కుకునే ధైర్యాన్ని పిల్లలకు నూరిపోయాల్సిన బాధ్యత తల్లిదండ్రులు, ఉపాధ్యాయులపై ఉందని సూచిస్తున్నారు. మార్కుల కోసం కాకుండా, జ్ఞానం కోసం చదివేలా ప్రోత్సహించాలని, విద్యార్థులలో మానసిక స్థైర్యాన్ని నింపడం అత్యవసరమని వారు అభిప్రాయపడుతున్నారు.