నాకు తెలిసిన శోభన్ బాబు ఎలా ఉండేవారంటే: నటుడు చిట్టిబాబు

తెలుగు తెరపై అందాల నటుడిగా శోభన్ బాబు ఒక వెలుగు వెలిగారు. రొమాంటిక్ హీరోగా అప్పట్లో ఆయన అందుకున్న సక్సెస్ లు అనేకం. ఎన్టీఆర్ - ఏఎన్నార్ నుంచి క్రమశిక్షణ నేర్చుకున్నాననీ, అదే తన జీవితాన్ని నడిపించిందనే విషయాన్ని ఆయన అనేక సందర్భాలలో చెబుతూ వచ్చారు. అలాంటి శోభన్ బాబు గురించి, 'తెలుగు వన్'కి ఇచ్చిన ఇంటర్వ్యూలో నటుడు చిట్టిబాబు ప్రస్తావించారు.

"శోభన్ బాబుగారితో కలిసి నేను కొన్ని సినిమాలలో నటించాను. ఆయనకి అన్నయ్య రాజబాబు అంటే చాలా ఇష్టం. సెట్లో అన్నయ్య ఉంటే ఆయనతో మాట్లాడటానికే శోభన్ బాబుగారు ఎక్కువ ఆసక్తిని కనబరుస్తూ ఉండేవారు. ఇంటికి వెళితే ఆయన ఎంతో ఆప్యాయంగా మాట్లాడేవారు. ఇంట్లో ఉన్నా .. సెట్లో ఉన్నా శోభన్ బాబుగారు అంటే ఒక పద్ధతి అంతే. తాను పెట్టుకున్న ప్రిన్సిపుల్స్ ను ఆయన ఎలాంటి పరిస్థితులలోను దాటేవారు కాదు" అని అన్నారు. 

డబ్బు .. సమయం .. ఆరోగ్యం విషయంలో శోభన్ బాబుగారు చాలా స్ట్రిక్ట్ గానే ఉండేవారు. పరిస్థితులను బట్టి తనకి నిర్మాతలు ఇవ్వవలసిన దానిని తగ్గించేవారు. అయితే ముందుగా చెప్పిన సమయానికి ఇవ్వాలని మాత్రం అనేవారు. నిజానికి ఆయనకి డబ్బు అత్యవసరం కాకపోయినప్పటికీ, తాను పెట్టుకున్న కొన్ని పద్ధతులను సడలించేవారు కాదు. కొంతమందితో మాత్రమే ఆయన చనువుగా ఉండేవారు. అలాంటి వ్యక్తిత్వాన్ని నేను మళ్లీ చూడలేదు" అని చెప్పారు.