యుద్ధ భయాలున్నా పడిపోయిన పసిడి... ఎందుకిలా జరిగింది?

ఇటీవలి రికార్డు స్థాయుల నుంచి బంగారం, వెండి ధరలు శుక్రవారం స్వల్పంగా వెనక్కి తగ్గాయి. మదుపరులు లాభాల స్వీకరణకు మొగ్గు చూపడం, అమెరికా డాలర్ బలపడటంతో పసిడిపై ఒత్తిడి పెరిగింది. అయితే, అంతర్జాతీయంగా నెలకొన్న ఉద్రిక్తతల కారణంగా బంగారం పతనం పరిమితంగానే ఉంది.

ఇవాళ‌ ఉదయం 11:10 గంటల సమయంలో మల్టీ కమోడిటీ ఎక్స్ఛేంజ్ (MCX)లో ఏప్రిల్ గోల్డ్ ఫ్యూచర్స్ 0.14 శాతం క్షీణించి 10 గ్రాములకు రూ. 1,60,046 వద్ద ట్రేడ్ అయింది. అలాగే మే సిల్వర్ ఫ్యూచర్స్ 0.19 శాతం నష్టపోయి కిలోకు రూ. 2,67,448కి చేరింది. అమెరికా-ఇరాన్ మధ్య కొనసాగుతున్న యుద్ధం, అధిక ముడిచమురు ధరల కారణంగా సురక్షిత పెట్టుబడిగా బంగారానికి డిమాండ్ బలంగానే ఉంది. ఈ అంశాలు పసిడి ధరలు భారీగా పడిపోకుండా అడ్డుకుంటున్నాయి.

ప్రస్తుతం బంగారం ధరలు ప్రధానంగా అమెరికా-ఇరాన్ యుద్ధ వార్తలు, డాలర్ మారకం విలువ, చమురు ధరల కదలికలపై ఆధారపడి ఉన్నాయని విశ్లేషకులు చెబుతున్నారు. మోతీలాల్ ఓస్వాల్ ఫైనాన్షియల్ సర్వీసెస్ కమోడిటీ అనలిస్ట్ మానవ్ మోదీ మాట్లాడుతూ... "అంతర్జాతీయ ఉద్రిక్తతలు ఉన్నప్పటికీ, బలపడుతున్న డాలర్, పెరుగుతున్న బాండ్ ఈల్డ్స్, ఫెడరల్ రిజర్వ్ విధానాలపై అనిశ్చితి వంటి కారణాలతో బంగారం రాణించలేకపోతోంది" అని వివరించారు.

ఎన్రిచ్ మనీ సీఈఓ పొన్ముడి ఆర్ ప్రకారం బంగారం ధరలు రికార్డు స్థాయులను తాకిన తర్వాత స్వల్పకాలిక కరెక్షన్‌లోకి ప్రవేశించాయి. అయితే, దీర్ఘకాలికంగా బంగారంపై సానుకూల ధోరణి చెక్కుచెదరలేదని, ప్రస్తుత తగ్గుదల తాత్కాలికమేనని ఆయన అభిప్రాయపడ్డారు. మరోవైపు ప్రపంచ ఈక్విటీ మార్కెట్లలో బలహీనత కూడా పసిడిపై ప్రభావం చూపింది. మార్కెట్ల అస్థిరత కారణంగా నష్టాలను పూడ్చుకోవడానికి కొందరు ఇన్వెస్టర్లు బంగారాన్ని అమ్మి నగదు సమీకరించుకుంటున్నారు.

ప్రస్తుతం బ్రెంట్ క్రూడ్ బ్యారెల్ ధర 0.47 శాతం తగ్గి 99.99 డాలర్ల వద్ద ఉండగా, WTI క్రూడ్ 0.67 శాతం తగ్గి 95.09 డాలర్ల వద్ద ట్రేడ్ అవుతోంది. విశ్లేషకుల అంచనా ప్రకారం ఎంసీఎక్స్‌ గోల్డ్‌కు రూ. 1,56,000 - రూ. 1,57,000 శ్రేణిలో మద్దతు ఉండగా, రూ. 1,75,000 - రూ. 1,80,000 వద్ద నిరోధం ఎదురుకావచ్చని అంచనా వేస్తున్నారు. వెండికి రూ. 2,58,000 వద్ద మద్దతు, రూ. 2,78,000 వద్ద నిరోధక స్థాయులు ఉన్నాయి.