ఢిల్లీ గగనతలంలో జీపీఎస్ స్పూఫింగ్ లు... కేంద్రం వివరణ

దేశ రాజధాని ఢిల్లీ గగనతలంలో విమానాలకు తీవ్రమైన సమస్య ఎదురవుతోంది. విమానాల గ్లోబల్ పొజిషనింగ్ సిస్టమ్ (జీపీఎస్) సిగ్నళ్లకు తరచూ అంతరాయం కలుగుతోంది. ఈ ఏడాది జనవరి, ఫిబ్రవరి నెలల్లోనే ఏకంగా 623 సార్లు జీపీఎస్ అంతరాయ ఘటనలు (జీపీఎస్ స్పూఫింగ్ లు) నమోదయ్యాయని కేంద్ర ప్రభుత్వం గురువారం పార్లమెంటుకు తెలియజేసింది. 

లోక్‌సభలో అడిగిన ఓ ప్రశ్నకు కేంద్ర పౌర విమానయాన శాఖ సహాయ మంత్రి మురళీధర్ మోహోల్ లిఖితపూర్వకంగా సమాధానం ఇచ్చారు. 2023 నవంబర్ నుంచి 2025 డిసెంబర్ మధ్య కాలంలో మొత్తం 2,354 జీపీఎస్ అంతరాయ ఘటనలు నమోదైనట్లు ఆయన వివరించారు. 'జీపీఎస్ స్పూఫింగ్' కారణంగా ఈ సమస్యలు తలెత్తుతున్నాయని, ఇది ఉద్దేశపూర్వకంగా చేసే రేడియో ఫ్రీక్వెన్సీ జోక్యమని మంత్రి తెలిపారు.

ఈ సమస్యను పరిష్కరించేందుకు డైరెక్టరేట్ జనరల్ ఆఫ్ సివిల్ ఏవియేషన్ (డీజీసీఏ) ఇప్పటికే పలు చర్యలు చేపట్టిందని మంత్రి తెలిపారు. 2023 నవంబర్ 24న ఒక అడ్వైజరీ సర్క్యులర్‌తో పాటు, ఢిల్లీ విమానాశ్రయం చుట్టూ జరిగే ఘటనలను ఎప్పటికప్పుడు నివేదించేందుకు 2025 నవంబర్ 10న ఒక స్టాండర్డ్ ఆపరేటింగ్ ప్రొసీజర్ (ఎస్ఓపీ)ను జారీ చేసినట్లు పేర్కొన్నారు. ఈ ఘటనలపై దర్యాప్తు చేయాలని ఎయిర్‌పోర్ట్స్ అథారిటీ ఆఫ్ ఇండియా (ఏఏఐ) కూడా వైర్‌లెస్ మానిటరింగ్ ఆర్గనైజేషన్ (డబ్ల్యూఎంఓ)కు పలుమార్లు తెలియజేసింది.

జీపీఎస్ స్పూఫింగ్ కారణంగా విమానం ఉన్న ప్రదేశం తప్పుగా చూపడం, భూమికి సమీపంలో ఉన్నట్లుగా తప్పుడు హెచ్చరికలు రావడం వంటివి జరుగుతాయని, ఇది విమాన భద్రతకు ప్రమాదకరమని అధికారులు చెబుతున్నారు. ఇలాంటి సమయాల్లో ఎయిర్ ట్రాఫిక్ కంట్రోలర్లు (ఏటీసీ) నేరుగా పైలట్లకు మార్గనిర్దేశం చేస్తూ సహాయపడుతున్నారు. 

కాగా, కేంద్ర పౌర విమానయాన శాఖ మంత్రి రామ్మోహన్ నాయుడు మాట్లాడుతూ, ఢిల్లీ విమానాశ్రయంలోని రన్‌వే 10 వద్దకు వచ్చే విమానాలకు ఈ సమస్య ఎదురైనప్పటికీ, ప్రత్యామ్నాయ ఏర్పాట్ల ద్వారా ఇతర రన్‌వేలలో విమానాల రాకపోకలపై ఎలాంటి ప్రభావం పడలేదని గతంలో స్పష్టం చేశారు.