చమురు ధరల ప్రకంపనలు... భారీగా పతనమైన సెన్సెక్స్, నిఫ్టీ

అంతర్జాతీయంగా ముడి చమురు ధరల్లో నెలకొన్న తీవ్ర అస్థిరత గురువారం భారత స్టాక్ మార్కెట్లను కుదిపేసింది. ఇన్వెస్టర్ల సెంటిమెంట్ దెబ్బతినడంతో అన్ని రంగాల్లో అమ్మకాల ఒత్తిడి వెల్లువెత్తింది. దీంతో సూచీలు భారీ నష్టాలతో ముగిశాయి. ట్రేడింగ్ ముగిసేసరికి, బీఎస్ఈ సెన్సెక్స్ 829.29 పాయింట్లు క్షీణించి 76,034.42 వద్ద స్థిరపడింది. ఎన్ఎస్ఈ నిఫ్టీ 227.70 పాయింట్లు నష్టపోయి 23,639.15 వద్ద ముగిసింది.

పశ్చిమాసియాలో చోటుచేసుకుంటున్న పరిణామాలు, ఇంధన సరఫరాపై నెలకొన్న ఆందోళనలు కూడా మార్కెట్ల పతనానికి కారణమయ్యాయి. ఈ నేపథ్యంలో భారత విదేశాంగ మంత్రి ఎస్. జైశంకర్, ఇరాన్ విదేశాంగ మంత్రితో సముద్ర, ఇంధన భద్రతపై చర్చలు జరిపారు. హార్ముజ్ జలసంధి గుండా భారత జెండా ఉన్న నౌకలను సురక్షితంగా వెళ్లనిస్తామని ఇరాన్ హామీ ఇచ్చినట్లు విదేశాంగ శాఖ ప్రతినిధి రణధీర్ జైస్వాల్ తెలిపారు.

ఈ సెషన్‌లో నిఫ్టీ50 సూచీలో ఆటోమొబైల్ కంపెనీల షేర్లు భారీగా నష్టపోయాయి. మహీంద్రా అండ్ మహీంద్రా, ఐషర్ మోటార్స్, మారుతీ సుజుకీ ఇండియా టాప్ లూజర్లుగా నిలిచాయి. గ్యాస్ సరఫరాపై ఆంక్షలు, కొరత ఏర్పడవచ్చన్న భయాలతో నిఫ్టీ ఆటో ఇండెక్స్ అత్యధికంగా పతనమైంది. ఎఫ్ఎంసీజీ, రియాల్టీ సూచీలు కూడా నష్టపోయాయి. అయితే, ముడి చమురు ధరల పెరుగుదల కారణంగా నిఫ్టీ ఆయిల్ అండ్ గ్యాస్ ఇండెక్స్ లాభపడిన ఏకైక రంగంగా నిలిచింది.

బెంచ్‌మార్క్ సూచీలతో పాటు బ్రాడర్ మార్కెట్లు కూడా నష్టపోయాయి. నిఫ్టీ మిడ్‌క్యాప్ 100 ఇండెక్స్ 0.37 శాతం, నిఫ్టీ స్మాల్‌క్యాప్ 100 ఇండెక్స్ 0.69 శాతం మేర క్షీణించాయి. సాంకేతికంగా నిఫ్టీకి 23,500 వద్ద బలమైన మద్దతు ఉందని, 23,700 వద్ద నిరోధం ఎదురుకావచ్చని నిపుణులు విశ్లేషిస్తున్నారు. మరోవైపు, డాలర్‌తో పోలిస్తే చారిత్రక కనిష్ఠానికి పడిపోయిన రూపాయి, ఆర్‌బీఐ చర్యలతో స్వల్పంగా కోలుకుంది.