నా సక్సెస్‌కు కారణం సచిన్ సార్.. అసలు విషయం చెప్పిన సంజూ శాంసన్

2026 టీ20 ప్రపంచకప్‌లో భారత జట్టు విజేతగా నిలవడంలో కీలక పాత్ర పోషించి 'ప్లేయర్ ఆఫ్ ది టోర్నమెంట్' అవార్డు గెలుచుకున్న వికెట్ కీపర్-బ్యాటర్ సంజూ శాంసన్ తన విజయ రహస్యాన్ని వెల్లడించాడు. తన అద్భుత ప్రదర్శన వెనుక దిగ్గజ క్రికెటర్ సచిన్ టెండూల్కర్ మార్గదర్శనం ఉందని తెలిపాడు. మ్యాచ్ అనంతరం జరిగిన ప్రజెంటేషన్ వేడుకలో శాంసన్ ఈ విషయాలను పంచుకున్నాడు.

"గత కొన్ని నెలలుగా నేను సచిన్ టెండూల్కర్ సర్‌తో నిరంతరం టచ్‌లో ఉన్నాను. ఆస్ట్రేలియాలో మ్యాచ్‌లు ఆడే అవకాశం రాక, బయట కూర్చున్నప్పుడు.. ఎలాంటి మైండ్‌సెట్‌తో ఉండాలని ఆలోచించాను. ఆ సమయంలో సచిన్ సర్‌ను సంప్రదించి చాలా విషయాలు చర్చించాను. ఫైనల్ మ్యాచ్‌కు ముందు రోజు కూడా ఆయన నాకు ఫోన్ చేసి ఎలా ఫీల్ అవుతున్నావని అడిగారు. ఆయన నుంచి లభించిన మార్గదర్శనం, ఆటపై స్పష్టత, సన్నద్ధతకు నేను ఎంతో రుణపడి ఉంటాను" అని శాంసన్ వివరించాడు.

2024 టీ20 ప్రపంచకప్ గెలిచిన జట్టులో ఉన్నప్పటికీ ఒక్క మ్యాచ్ కూడా ఆడని శాంసన్.. ఈసారి సూపర్-8లో జింబాబ్వేతో మ్యాచ్ నుంచి తిరిగి జట్టులోకి వచ్చాడు. కీలకమైన మ్యాచ్‌లలో అద్భుతంగా రాణించాడు. వెస్టిండీస్‌పై 97 నాటౌట్, ఇంగ్లండ్‌తో సెమీఫైనల్‌లో 89 పరుగులు చేసి జట్టు విజయంలో ప్రధాన పాత్ర పోషించాడు. ఈ టోర్నీలో మొత్తం 321 పరుగులు సాధించాడు.

"ఇదంతా ఒక కలలా ఉంది. చాలా సంతోషంగా, కృతజ్ఞతగా ఫీల్ అవుతున్నాను. న్యూజిలాండ్‌తో సిరీస్ తర్వాత నా కలలన్నీ చెదిరిపోయాయని భావించాను. కానీ దేవుడి ప్రణాళికలు వేరేలా ఉన్నాయి. కీలకమైన మ్యాచ్‌లలో తిరిగి జట్టులోకి వచ్చి దేశం కోసం నా వంతు కృషి చేయగలిగాను" అని శాంసన్ భావోద్వేగంతో అన్నాడు.