ఆసుపత్రి నుంచి వచ్చి.. జట్టును గెలిపించి.. అభిషేక్ శర్మ కమ్‌బ్యాక్ స్టోరీ

టీ20 ప్రపంచకప్ 2026లో డిఫెండింగ్ ఛాంపియన్ టీమిండియా తిరిగి విజయాల బాట పట్టింది. సూపర్ 8 దశలో భాగంగా జింబాబ్వేతో జరిగిన మ్యాచ్‌లో 72 పరుగుల భారీ తేడాతో ఘన విజయం సాధించింది. దక్షిణాఫ్రికాతో గత మ్యాచ్‌లో ఎదురైన ఓటమి నుంచి బలంగా పుంజుకుంది. ఈ మ్యాచ్‌లో యువ ఓపెనర్ అభిషేక్ శర్మ (30 బంతుల్లో 55) బాధ్యతాయుతమైన అర్ధశతకంతో జట్టు విజయంలో కీలక పాత్ర పోషించాడు.

గత కొన్ని మ్యాచ్‌లలో పరుగులు చేయడానికి ఇబ్బంది పడిన అభిషేక్ శర్మ, ఈ ఇన్నింగ్స్‌తో ఫామ్‌లోకి వచ్చాడు. మ్యాచ్ అనంతరం బీసీసీఐకి ఇచ్చిన ఇంటర్వ్యూలో అతడు తన భావాలను పంచుకున్నాడు. "ఇది కేవలం జట్టు కాదు, ఒక కుటుంబం లాంటిది. నేను విఫలమైనా, నాపై నాకంటే ఎక్కువగా జట్టు సభ్యులు, కోచ్‌లు నమ్మకం ఉంచారు. వారి నమ్మకాన్ని నిలబెట్టినందుకు చాలా ఉపశమనంగా ఉంది" అని అభిషేక్ పేర్కొన్నాడు.

వాస్తవానికి ఈ టోర్నమెంట్‌కు ముందు అనారోగ్యంతో ఆసుపత్రిలో ఉన్నానని, ఆరంభం సరిగా లేదని అభిషేక్ వెల్లడించాడు. "నువ్వు సున్నా పరుగులు చేసినా ఫర్వాలేదు, జట్టులో నీ స్థానం పదిలం, అన్ని మ్యాచ్‌లు ఆడతావని వారు భరోసా ఇచ్చారు. ఒక ఆటగాడిగా ఇంతకంటే మద్దతు ఏం కావాలి?" అని అన్నాడు. ఈ మ్యాచ్‌లో అభిషేక్ తన ఆటతీరును మార్చుకున్నాడు. దూకుడుకు బదులుగా నియంత్రణతో ఆడాడు. తన అర్ధశతకంలో ఎక్కువ పరుగులు బౌలర్ మీదుగా స్ట్రెయిట్‌గా కొట్టడం అతని పరిణతికి నిదర్శనం.

భారత బ్యాటింగ్ యూనిట్ మొత్తం ఈ మ్యాచ్‌లో సమష్టిగా రాణించింది. అభిషేక్ శర్మ సంయమనంతో ఆడిన ఇన్నింగ్స్ మిడిల్ ఆర్డర్‌పై ఒత్తిడి తగ్గించింది. ఈ విజయంతో ఆత్మవిశ్వాసాన్ని తిరిగి పొందిన భారత్, ఆదివారం కోల్‌కతాలో వెస్టిండీస్‌తో తమ తదుపరి సూపర్ ఎయిట్ మ్యాచ్ ఆడనుంది.