టీ20 ప్రపంచకప్‌: ఇంటిదారి పట్టిన శ్రీలంక.. పాత రోజుల్ని గుర్తుచేసుకుంటున్న ఫ్యాన్స్

టీ20 ప్రపంచకప్ 2026లో సహ ఆతిథ్య జట్టు శ్రీలంక ప్రయాణం ముగిసింది. బుధవారం కొలంబోలోని ప్రేమదాస స్టేడియంలో న్యూజిలాండ్‌తో జరిగిన సూపర్-8 మ్యాచ్‌లో 61 పరుగుల భారీ తేడాతో ఓటమి పాలవ్వడంతో శ్రీలంక సెమీఫైనల్ రేసు నుంచి నిష్క్రమించింది. ఈ ఓటమితో లంక అభిమానులు తీవ్ర నిరాశలో మునిగిపోయారు.

ఈ మ్యాచ్‌లో న్యూజిలాండ్ ఆల్‌రౌండర్ రచిన్ రవీంద్ర తన కెరీర్‌లోనే అత్యుత్తమ ప్రదర్శన చేశాడు. కేవలం 27 పరుగులిచ్చి 4 కీలక వికెట్లు పడగొట్టి శ్రీలంక బ్యాటింగ్ లైనప్‌ను కుప్పకూల్చాడు. దీంతో న్యూజిలాండ్ సునాయాసంగా విజయం సాధించింది.

ఈ ఓటమి తర్వాత లంక అభిమానులు తమ క్రికెట్ స్వర్ణయుగాన్ని గుర్తుచేసుకుంటున్నారు. అర్జున రణతుంగ ధైర్యవంతమైన నాయకత్వం, సనత్ జయసూర్య విధ్వంసకర బ్యాటింగ్, మహేల జయవర్ధనే, కుమార్ సంగక్కర సొగసైన ఆటతీరు, చమిందా వాస్ స్వింగ్, ముత్తయ్య మురళీధరన్ స్పిన్ మాయాజాలాన్ని తలుచుకుంటున్నారు. అరవింద డిసిల్వా, లసిత్ మలింగ, తిలకరత్నే దిల్షాన్ వంటి ఎందరో దిగ్గజాలు సాధించిన విజయాలు ఇప్పుడు కేవలం జ్ఞాపకాలుగా మిగిలిపోయాయని వాపోతున్నారు.

ఈ సందర్భంగా ఓ స్థానిక అభిమాని మాట్లాడుతూ.. "ఆ దిగ్గజాలు వెళ్ళిపోయాక మేము శ్రీలంక క్రికెట్ చూడటం మానేశాం. వారు నిజమైన క్రికెటర్లు. ఇప్పటి ఆటగాళ్లు ఆ స్థాయికి సరిపోరు" అని ఆవేదన వ్యక్తం చేశాడు. కేవలం ఆటగాళ్ల ప్రదర్శన మాత్రమే కాదని, శ్రీలంక క్రికెట్ బోర్డులోని పరిపాలనా లోపాలు కూడా జట్టు వైఫల్యాలకు కారణమని మరికొందరు విమర్శిస్తున్నారు.