టీ20 వరల్డ్ కప్: అమెరికాపై అతికష్టంగా బ్యాటింగ్ చేసిన టీమిండియా

టీ20 ప్రపంచకప్‌లో భాగంగా అమెరికాతో జరిగిన మ్యాచ్‌లో పటిష్టమైన టీమిండియా బ్యాటింగ్ లైనప్ తడబడింది. అమెరికా బౌలర్లు క్రమశిక్షణతో రాణించడంతో, భారత బ్యాటర్లు పెవిలియన్‌కు క్యూ కట్టారు. ఈ క్లిష్ట పరిస్థితుల్లో కెప్టెన్ సూర్యకుమార్ యాదవ్ (84 నాటౌట్) ఒంటరి పోరాటం చేయడంతో, నిర్ణీత 20 ఓవర్లలో 9 వికెట్ల నష్టానికి భారత్ 161 పరుగుల గౌరవప్రదమైన స్కోరు చేయగలిగింది.

ముంబైలోని వాంఖడే స్టేడియంలో జరిగిన ఈ మ్యాచ్‌లో టాస్ గెలిచిన అమెరికా బౌలింగ్ ఎంచుకుంది. ఆ జట్టు నిర్ణయం సరైనదేనని నిరూపిస్తూ బౌలర్లు చెలరేగారు. యువ ఓపెనర్ అభిషేక్ శర్మ (0) డకౌట్‌గా వెనుదిరగగా, ఇషాన్ కిషన్ (20), తిలక్ వర్మ (25) కాసేపు నిలిచినా భారీ స్కోర్లుగా మలచలేకపోయారు. ముఖ్యంగా, ఇన్నింగ్స్ ఆరో ఓవర్‌లో తిలక్ వర్మ, శివమ్ దూబే (0) వెంటవెంటనే ఔట్ కావడంతో భారత్ 46 పరుగులకే 4 వికెట్లు కోల్పోయి కష్టాల్లో పడింది. రింకూ సింగ్ (6), హార్దిక్ పాండ్యా (5) కూడా విఫలమయ్యారు.

ఒకవైపు వికెట్లు పడుతున్నా, కెప్టెన్ సూర్యకుమార్ యాదవ్ మాత్రం క్రీజులో పాతుకుపోయి అద్భుతమైన ఇన్నింగ్స్ ఆడాడు. కేవలం 49 బంతుల్లో 10 ఫోర్లు, 4 సిక్సర్లతో అజేయంగా 84 పరుగులు చేసి జట్టుకు వెన్నెముకగా నిలిచాడు. అమెరికా బౌలర్లలో షాడ్లీ వాన్ షాల్క్‌విక్ 25 పరుగులిచ్చి 4 కీలక వికెట్లు పడగొట్టి భారత పతనాన్ని శాసించాడు. అతనికి తోడుగా హర్మీత్ సింగ్ రెండు వికెట్లు తీశాడు. సూర్యకుమార్ వీరోచిత పోరాటంతో భారత్, అమెరికా ముందు 162 పరుగుల లక్ష్యాన్ని నిర్దేశించింది.