నిర్మాతగా నిహారిక మరో ప్రయత్నం... ఏప్రిల్ 3న వస్తున్న 'రాకాస'

యువ నటుడు సంగీత్ శోభన్ సోలో హీరోగా పరిచయమవుతున్న కొత్త చిత్రం ‘రాకాస’. నటి, నిర్మాత నిహారిక కొణిదెల తన పింక్ ఎలిఫెంట్ పిక్చర్స్ బ్యానర్‌పై జీ స్టూడియోస్‌తో కలిసి ఈ సినిమాను నిర్మిస్తున్నారు. తాజాగా ఈ చిత్రానికి సంబంధించిన కీలక అప్‌డేట్‌ను చిత్రబృందం ప్రకటించింది. ‘రాకాస’ సినిమాను ఏప్రిల్ 3న ప్రపంచవ్యాప్తంగా గ్రాండ్‌గా విడుదల చేయనున్నట్లు అధికారికంగా వెల్లడించింది. ఈ మేరకు ఓ కొత్త పోస్టర్‌ను కూడా విడుదల చేసింది. ఇందులో సంగీత్ శోభన్ చీకటిలో చేతిలో కాగడా పట్టుకుని సీరియస్‌గా ఏదో వెతుకుతున్నట్లు కనిపించడం సినిమాపై ఆసక్తిని పెంచుతోంది.

‘కమిటీ కుర్రోళ్లు’ వంటి విభిన్న కథాంశంతో తొలి ప్రయత్నంలోనే నిర్మాతగా జాతీయ స్థాయిలో గుర్తింపు తెచ్చుకున్న నిహారిక, ఇప్పుడు ‘రాకాస’ చిత్రంతో మరోసారి ప్రేక్షకుల ముందుకు వస్తున్నారు. మానస శర్మ ఈ చిత్రంతో దర్శకురాలిగా పరిచయమవుతున్నారు. ఇప్పటికే విడుదలైన టైటిల్ మోషన్ పోస్టర్, గ్లింప్స్‌కు ప్రేక్షకుల నుంచి అద్భుతమైన స్పందన లభించింది. తనదైన కామెడీ టైమింగ్‌తో గుర్తింపు తెచ్చుకున్న సంగీత్ శోభన్, ఈ సినిమాలో సోలో హీరోగా ఎలా మెప్పిస్తాడనే దానిపై అంచనాలు నెలకొన్నాయి. ఇది ఒక పూర్తిస్థాయి వినోదాత్మక చిత్రంగా ఉంటుందని తెలుస్తోంది.

ఈ చిత్రంలో వెన్నెల కిశోర్‌, బ్ర‌హ్మాజీ, త‌నికెళ్ల భ‌ర‌ణి, ఆశిష్ విద్యార్థి, గెట‌ప్ శ్రీను వంటి ప్రముఖ నటులు కీలక పాత్రల్లో నటిస్తున్నారు. అనుదీప్ దేవ్ సంగీతం అందిస్తుండగా, రాజు ఎదురోలు సినిమాటోగ్రాఫర్‌గా పనిచేస్తున్నారు. ప్రస్తుతం సినిమా చిత్రీకరణ శరవేగంగా జరుగుతోందని, త్వరలోనే మరిన్ని వివరాలు వెల్లడిస్తామని నిర్మాతలు తెలిపారు. ఉమేశ్ కుమార్ బన్సాల్ ఈ చిత్రానికి మరో నిర్మాతగా వ్యవహరిస్తున్నారు. భారీ తారాగణంతో తెరకెక్కుతున్న ఈ సినిమా వేసవిలో ప్రేక్షకులను ఏ మేరకు అలరిస్తుందో చూడాలి.
​