ఇద్దరు యువకుల వేధింపులు.. మహిళా కానిస్టేబుల్ ఆత్మహత్య

ఇద్దరు యువకుల నుంచి ఎదురైన తీవ్ర వేధింపులు భరించలేక ఓ మహిళా కానిస్టేబుల్ ఆత్మహత్యకు పాల్పడిన విషాద ఘటన హనుమకొండ జిల్లాలో చోటుచేసుకుంది. "మీ ఇద్దరి వల్లే నా జీవితం నాశనమైంది, అందుకే చనిపోతున్నా" అని నిందితుల్లో ఒకరికి ఫోన్ చేసి చెప్పిన తర్వాత ఆమె పురుగుల మందు తాగి ప్రాణాలు తీసుకుంది.

పోలీసులు వెల్లడించిన వివరాల ప్రకారం.. వరంగల్ జిల్లా పర్వతగిరి మండలం సీత్యాతండాకు చెందిన అనిత.. వరంగల్ పోలీస్ కమిషనరేట్‌లో ఏఆర్ కానిస్టేబుల్‌గా విధులు నిర్వహిస్తోంది. ఆమె దూరపు బంధువైన రాజేందర్, నాలుగేళ్లుగా పెళ్లి చేసుకుంటానని నమ్మించి ఆమెతో సన్నిహితంగా ఉన్నాడు. అయితే, కొంతకాలంగా డ్యూటీలో ఉన్నప్పుడు వీడియో కాల్ చేయాలంటూ, ఇతరులతో మాట్లాడొద్దంటూ వేధించడం మొదలుపెట్టాడు. అతని ప్రవర్తన నచ్చకపోవడంతో ఈ పెళ్లికి అనిత కుటుంబసభ్యులు నిరాకరించారు.

ఈ క్రమంలో అనితకు తన క్లాస్‌మేట్ అయిన జబ్బార్‌లాల్‌తో పరిచయం ఏర్పడింది. అతడిని వివాహం చేసుకోవాలని ఆమె నిర్ణయించుకుంది. ఈ విషయం తెలుసుకున్న రాజేందర్, జబ్బార్‌లాల్‌కు ఫోన్ చేసి అనిత గురించి చెడుగా చెప్పాడు. అప్పటి నుంచి జబ్బార్‌లాల్ కూడా ఆమెను వేధించడం ప్రారంభించాడు. పెళ్లి చేసుకోవాలంటే డబ్బులు ఇవ్వాలని డిమాండ్ చేయసాగాడు.

ఇద్దరి నుంచి ఎదురవుతున్న మానసిక వేదనతో కుంగిపోయిన అనిత, ఈ నెల 27న రాజేందర్‌కు ఫోన్ చేసి కన్నీరు పెట్టుకుంది. మీ వల్లే ఆత్మహత్య చేసుకుంటున్నానని చెప్పగా, 'చస్తే చావు' అంటూ అతను నిర్లక్ష్యంగా బదులిచ్చాడు. దీంతో తీవ్ర మనస్తాపానికి గురైన అనిత వెంటనే గడ్డి మందు (కలుపు నివారణకు ఉపయోగించే మందు) తాగింది. కుటుంబసభ్యులు హుటాహుటిన ఆసుపత్రికి తరలించగా అక్కడ చికిత్స పొందుతూ ఆమె మృతి చెందింది. మృతురాలి కుటుంబసభ్యుల ఫిర్యాదు మేరకు పోలీసులు రాజేందర్, జబ్బార్‌లాల్‌పై కేసు నమోదు చేసి దర్యాప్తు చేస్తున్నారు.