ఇరాన్‌లో అమానుషం: గొంతు నొక్కుతున్న ఖమేనీ సర్కార్.. చిత్రహింసల వెనుక భయానక వాస్తవాలు!

‘ముల్లాల పాలన అంతం కావాలి’.. ఇరాన్ వీధుల్లో ఇన్నాళ్లూ వినిపించిన ఈ గర్జనను అణచివేయడానికి అక్కడి ప్రభుత్వం దమనకాండకు దిగుతోంది. ఇరాన్ విధించిన 'డిజిటల్ చీకటి' (ఇంటర్నెట్ బ్లాక్ అవుట్) పొరలు విడిపోతున్న కొద్దీ నిరసనకారులపై జరుగుతున్న భయంకరమైన వేధింపుల గాథలు ఒక్కొక్కటిగా బయటకు వస్తున్నాయి. అయతొల్లా ఖమేనీ పాలనకు వ్యతిరేకంగా గొంతు ఎత్తిన వారు భారీ మూల్యాన్నే చెల్లించుకుంటున్నారు.

జైళ్లలో నిర్బంధించిన నిరసనకారులను మానసికంగా కుంగదీయడానికి భద్రతా బలగాలు అమానవీయ పద్ధతులను అనుసరిస్తున్నాయని అంతర్జాతీయ మానవ హక్కుల సంఘాలు ఆందోళన వ్యక్తం చేస్తున్నాయి. ఖైదీలను గంటల తరబడి నగ్నంగా ఉంచడం, వారి అనుమతి లేకుండానే శరీరంలోకి తెలియని ద్రవాలను (ఇంజెక్షన్ల రూపంలో) పంపడం వంటివి జరుగుతున్నట్లు బాధితుల కుటుంబ సభ్యులు ఆరోపిస్తున్నారు. ఈ ఇంజెక్షన్ల వల్ల నిరసనకారులు మతిస్థిమితం కోల్పోవడం లేదా దీర్ఘకాలిక అనారోగ్యానికి గురవుతున్నారు.

హిజాబ్ వ్యతిరేక పోరాటంతో మొదలైన ఈ ఉద్యమం ఇప్పుడు పూర్తిస్థాయి రాజకీయ విప్లవంగా మారింది. ప్రభుత్వం వేల సంఖ్యలో అరెస్టులు చేసినా, ఉరిశిక్షలు అమలు చేసినా ప్రజల్లో ఆగ్రహం తగ్గడం లేదు. నిరసనలు జరిగిన ప్రాంతాల్లో కమ్యూనికేషన్ వ్యవస్థలను పూర్తిగా స్తంభింపజేయడం వల్ల, లోపల ఎంతమంది ప్రాణాలు కోల్పోయారో కూడా తెలియని పరిస్థితి నెలకొంది.

ఇరాన్ అకృత్యాలపై ఐక్యరాజ్యసమితితో పాటు పలు దేశాలు ఆంక్షలు విధిస్తున్నా, ఖమేనీ ప్రభుత్వం మాత్రం వెనక్కి తగ్గడం లేదు. బయట ప్రపంచానికి ఏ సమాచారం అందకుండా జాగ్రత్తపడుతున్నప్పటికీ, రహస్యంగా చిత్రీకరించిన వీడియోలు, సామాజిక మాధ్యమాల ద్వారా అందుతున్న వార్తలు ఇరాన్ జైళ్లలో జరుగుతున్న నరకాన్ని ప్రపంచానికి చాటిచెబుతున్నాయి.