ది నెక్ట్స్ సెట్.. సానియా మీర్జా కొత్త సంస్థ

భారత మాజీ టెన్నిస్ స్టార్ సానియా మీర్జా మరో కీలక బాధ్యతను స్వీకరించారు. దేశంలో మహిళల టెన్నిస్‌కు మరింత ప్రోత్సాహం అందించే లక్ష్యంతో ఆమె ఒక కొత్త కంపెనీని ప్రారంభించారు. ఆరుసార్లు గ్రాండ్‌స్లామ్ ఛాంపియన్‌గా నిలిచిన సానియా.. 'ది నెక్స్ట్ సెట్' పేరుతో ఈ సంస్థను మంగళవారం అధికారికంగా ప్రకటించారు.

భారతదేశంలో అభివృద్ధి చెందుతున్న మహిళా అథ్లెట్లకు సరైన మార్గదర్శకత్వం, వృత్తిపరమైన మద్దతు అందించడమే 'ది నెక్స్ట్ సెట్' ప్రధాన లక్ష్యం. మహిళా టెన్నిస్ క్రీడాకారులు మరింత ప్రొఫెషనల్‌గా ఎదగడానికి అవసరమైన అన్ని సహాయాలను ఈ సంస్థ అందిస్తుందని ఆమె తెలిపారు.

ఈ కంపెనీ ద్వారా మహిళా క్రీడాకారులకు అనుభవజ్ఞులైన కోచ్‌లు, ఫిజియోథెరపిస్టులు, టోర్నమెంట్లకు తోడుగా ప్రయాణించే శిక్షకులను అందిస్తారు. అంతేకాదు, సానియా మీర్జా అకాడమీ ఆధ్వర్యంలో ప్రత్యేక టెన్నిస్ శిబిరాలు, కోచింగ్ వర్క్‌షాప్‌లు నిర్వహిస్తారు. ఈ వర్క్‌షాప్‌లలో ఆటగాళ్ల సాంకేతిక, వ్యూహాత్మక, శారీరక, మానసిక అంశాలపై ప్రత్యేకంగా దృష్టి సారిస్తారు.

ఈ సందర్భంగా సానియా మీర్జా మాట్లాడుతూ.. ‘ది నెక్స్ట్ సెట్ నాకు ఎంతో ప్రత్యేకమైనది. నా కెరీర్‌లో ఎదురైన ఒడిదుడుకులే సరైన సమయంలో సరైన మార్గదర్శకత్వం ఎంత ముఖ్యమో నాకు నేర్పాయి. భారతీయ మహిళా టెన్నిస్‌లో అపారమైన ప్రతిభ ఉంది. సరైన మద్దతు లభిస్తే మన ఆటగాళ్లు పెద్ద కలలు కని, ప్రపంచ స్థాయిలో పోటీ పడగలరు. తదుపరి తరం కోసం బలమైన మార్గాలను నిర్మించడమే ఈ చొరవ యొక్క ముఖ్య ఉద్దేశం’ అని అన్నారు.

సానియా మీర్జా కెరీర్ విషయానికి వస్తే ఆమె దేశంలో అత్యంత విజయవంతమైన టెన్నిస్ క్రీడాకారిణిగా గుర్తింపు పొందారు. తన కెరీర్‌లో ప్రైజ్‌మనీ రూపంలో రూ.7.2 మిలియన్లకు పైగా గెలుచుకున్న ఆమె, డబుల్స్‌లో ప్రపంచ నంబర్‌వన్ స్థానాన్ని అందుకున్నారు. మహిళల డబుల్స్‌లో మూడు, మిక్స్‌డ్ డబుల్స్‌లో మూడు కలిపి మొత్తం ఆరు గ్రాండ్‌స్లామ్ టైటిళ్లను సానియా సొంతం చేసుకున్నారు.