Dhurandhar Movie: బాహుబలి-2 రికార్డును అధిగమించిన ధురంధర్

రికార్డులు బద్దలు కొట్టడానికే అన్నట్లుగా ధురంధర్ చిత్రం బాక్సాఫీస్ వద్ద తన దూకుడును కొనసాగిస్తోంది. ప్రపంచవ్యాప్తంగా ఇప్పటికే రూ.1300 కోట్లకు పైగా వసూళ్లు సాధించి ట్రేడ్ వర్గాలను విస్మయానికి గురిచేస్తున్న ఈ చిత్రం, తాజాగా మరొక అరుదైన రికార్డును తన ఖాతాలో వేసుకుంది. ఉత్తర అమెరికాలో అత్యధిక వసూళ్లు సాధించిన భారతీయ చిత్రంగా ధురంధర్ నూతన చరిత్ర సృష్టించింది.

ఇంతవరకు ఈ ఘనత ఎస్.ఎస్. రాజమౌళి దర్శకత్వంలో ప్రభాస్, రానా నటించిన బాహుబలి - 2 పేరిట ఉండేది. ఆ చిత్రం ఉత్తర అమెరికాలో 20.7 మిలియన్ డాలర్ల వసూళ్లు సాధించగా, గత తొమ్మిదేళ్లుగా ఈ రికార్డును ఏ చిత్రం కూడా అధిగమించలేకపోయింది. అయితే ఇప్పుడు ధురంధర్ చిత్రం 21 మిలియన్ డాలర్లకు పైగా వసూలు చేసి ఆ రికార్డును బద్దలు కొట్టింది.

భారత్‌లో అత్యధిక వసూళ్లు సాధించిన హిందీ చిత్రంగా ఇదివరకే గుర్తింపు పొందిన ధురంధర్, ఇప్పుడు యూఎస్ మార్కెట్‌లోనూ అగ్రస్థానానికి చేరింది. ఈ జాబితాలో ధురంధర్ తర్వాత బాహుబలి -2 (20.7 మిలియన్ డాలర్లు), కల్కి: 2898 ఏడీ (18.5 మిలియన్ డాలర్లు), పఠాన్ (17.5 మిలియన్ డాలర్లు), జవాన్ (15.6 మిలియన్ డాలర్లు) ఉన్నాయి. ఇక ఆస్ట్రేలియా మార్కెట్‌లోనూ ధురంధర్ అత్యధిక వసూళ్లు రాబట్టిన భారతీయ చిత్రాలలో ఒకటిగా నిలిచింది.