Anaganaga Oka Raju: 'అనగనగా ఒక రాజు'లో ఆ లైన్ ను టచ్ చేశారట!

 సంక్రాంతి పండుగ వస్తుందంటే చాలు .. పల్లెల్లో సందడి పెరుగుతూ పోతుంటుంది. ఇక పట్నాల్లో సినిమాల సందడి ఎక్కువగా కనిపిస్తూ ఉంటుంది. అందువల్లనే సంక్రాంతిని సినిమాల పండుగగా కూడా చెప్పుకుంటూ ఉంటారు. అలా ఈ సంక్రాంతికి ఇప్పటికే 'రాజా సాబ్' .. 'మన శంకర వరప్రసాద్ గారు' .. 'భర్త మహాశయులకు విజ్ఞప్తి' సినిమాలు థియేటర్లకు వచ్చాయి. ఇక రేపు 'అనగనగా ఒక రాజు' సినిమా ప్రేక్షకులను పలకరించడానికి రెడీ అవుతోంది.

ఈ సినిమాతో దర్శకుడిగా 'మారి' పరిచయమవుతున్నాడు. నవీన్ పోలిశెట్టి - మీనాక్షి చౌదరి జంటగా నటించిన ఈ సినిమాలో, కీలకమైన పాత్రలో రావు రమేశ్ కనిపించనున్నాడు. నవీన్ పోలిశెట్టికి మంచి క్రేజ్ ఉన్నప్పటికీ, కథల విషయంలో  .. పాత్రల విషయంలో చాలా కేర్ తీసుకుని మరీ ఎంచుకుంటున్నాడు. అందువలన ఈ కథలో విషయం కాస్త గట్టిగానే ఉంటుందని భావిస్తున్నారు. నవీన్ కామెడీ .. మీనాక్షి గ్లామర్ .. రావు రమేశ్ విలక్షణ నటన ఈ సినిమాకి ప్రధానమైన ఆకర్షణగా నిలుస్తాయని అంటున్నారు. 

ఇంతవరకూ ఈ సినిమాలో కామెడీనే ప్రధానమైన అంశంగా భావిస్తూ వచ్చారు. అయితే తాజాగా జరిగిన ఒక ఈవెంటులో నిర్మాత నాగవంశీ మాట్లాడుతూ, ఈ సినిమాలో పొలిటికల్ టచ్ కూడా ఉంటుందని చెప్పారు. పొలిటికల్ ఎపిసోడ్ కూడా చాలా ఇంట్రెస్టింగ్ గా ఉంటుందనీ, వీలైనంత వినోదాన్ని అందిస్తుందని అన్నారు. మొత్తానికి సంక్రాంతికి అవసరమైన అన్ని రకాల వినోదపరమైన అంశాలను కలుపుకుని వస్తున్న ఈ సినిమా, ఏ స్థాయిలో అలరిస్తుందనేది చూడాలి.