కోచ్ జెలెజ్నీతో విడిపోయిన నీరజ్ చోప్రా.. స్నేహపూర్వకంగా ముగిసిన భాగస్వామ్యం

భారత స్టార్ జావెలిన్ త్రోయర్, ఒలింపిక్ స్వర్ణ పతక విజేత నీరజ్ చోప్రా తన కోచ్, జావెలిన్ దిగ్గజం జాన్ జెలెజ్నీతో తన కోచింగ్ భాగస్వామ్యాన్ని ముగించుకున్నాడు. ఇద్దరూ పరస్పర అంగీకారంతో ఈ నిర్ణయం తీసుకున్నట్లు శనివారం విడుదల చేసిన ఒక ప్రకటనలో తెలిపారు. వీరి భాగస్వామ్యంలో నీరజ్ తొలిసారిగా 90 మీటర్ల మార్క్‌ను దాటినప్పటికీ, వరల్డ్ అథ్లెటిక్స్ ఛాంపియన్‌షిప్ స్వర్ణాన్ని నిలబెట్టుకోలేకపోయాడు.

ఈ భాగస్వామ్యం ఎంతో అర్థవంతంగా సాగిందని, ఇద్దరి మధ్య నమ్మకం, గౌరవం ఉన్నాయని నీరజ్, జెలెజ్నీ పేర్కొన్నారు. తన చిన్ననాటి హీరో అయిన జెలెజ్నీ వద్ద శిక్షణ తీసుకోవడం ఒక ప్రత్యేక అనుభవమని నీరజ్ అన్నాడు. "జాన్‌తో పనిచేయడం వల్ల నాకు ఎన్నో కొత్త ఆలోచనలు తెలిశాయి. టెక్నిక్, రిథమ్, మూవ్‌మెంట్‌పై ఆయన ఆలోచనా విధానం అద్భుతం. ఆయన నుంచి నేను చాలా నేర్చుకున్నాను" అని నీరజ్ వివరించాడు.

ఈ ప్రయాణంపై జెలెజ్నీ కూడా సంతృప్తి వ్యక్తం చేశాడు. "నీరజ్ లాంటి అథ్లెట్‌తో పనిచేయడం గొప్ప అనుభవం. అతను తొలిసారి 90 మీటర్ల మార్క్‌ను దాటడంలో నేను సహాయపడగలిగినందుకు సంతోషంగా ఉంది. వరల్డ్ ఛాంపియన్‌షిప్‌కు 12 రోజుల ముందు వెన్నునొప్పి రావడం అతని అవకాశాలను దెబ్బతీసింది. మా మధ్య స్నేహపూర్వక సంబంధం కొనసాగుతుంది" అని జెలెజ్నీ తెలిపాడు.

ఇకపై తన కెరీర్‌లో శిక్షణ బాధ్యతలను తానే నిర్దేశించుకోవాలని నీరజ్ భావిస్తున్నాడు. ఇప్పటివరకు తాను పనిచేసిన అత్యుత్తమ కోచ్‌ల నుంచి నేర్చుకున్న పాఠాలను ఆచరణలో పెట్టనున్నట్లు చెప్పాడు. "2026 సీజన్ కోసం ఎదురుచూస్తున్నాను. 2027 వరల్డ్ ఛాంపియన్‌షిప్, 2028 ఒలింపిక్స్ నా ముందున్న పెద్ద లక్ష్యాలు" అని నీరజ్ తన భవిష్యత్ ప్రణాళికలను వివరించాడు.