సర్వీసెస్‌పై ఢిల్లీ విజయం.. అదరగొట్టిన రిషబ్ పంత్

విజయ్ హజారే ట్రోఫీలో భాగంగా సర్వీసెస్‌తో జరిగిన మ్యాచ్‌లో ఢిల్లీ ఎనిమిది వికెట్ల తేడాతో ఘన విజయం సాధించింది. భారత వికెట్ కీపర్ కమ్ బ్యాట్స్‌మన్ రిషబ్ పంత్ 37 బంతుల్లో 67 పరుగులతో అద్భుత ప్రదర్శన కనబరిచాడు. జనవరి 11న వడోదరలో న్యూజిలాండ్‌తో జరగనున్న మూడు మ్యాచ్‌ల వన్డే సిరీస్ ప్రారంభం కానున్న నేపథ్యంలో, ఈ సిరీస్ కోసం సెలక్టర్లు భారత జట్టును ప్రకటించే సమయంలో పంత్ 4 ఫోర్లు, 6 సిక్సర్లతో చెలరేగిపోయాడు.

తొలుత బ్యాటింగ్ చేసిన సర్వీసెస్ 178 పరుగులకు ఆలౌటైంది. ఆ జట్టులో వికాస్ హత్వాలా (26) టాప్ స్కోరర్‌గా నిలిచాడు. కెప్టెన్ పుల్కిత్ నారంగ్ (22), టెయిలెండర్లు పూనమ్ సుభాష్ పూనియా (23), రాజ్ బహదూర్ పాల్ (25) కొంతమేర రాణించారు. ఈ లక్ష్యాన్ని ఢిల్లీ కేవలం 19.4 ఓవర్లలోనే ఛేదించింది.

ఢిల్లీ జట్టులో ఓపెనర్ ప్రియాంశ్ ఆర్య 45 బంతుల్లో 9 ఫోర్లు, 3 సిక్సర్లతో 72 పరుగులు చేసి నాటౌట్‌గా నిలిచి జట్టు విజయంలో కీలక పాత్ర పోషించాడు. కెప్టెన్ రిషబ్ పంత్ (67), నితీశ్ రాణా (32) కూడా రాణించారు. ఢిల్లీకి ఇది ఐదు మ్యాచ్‌లలో నాలుగో విజయం కావడం విశేషం.