ఏసీలు లేని 'కూల్' సిటీ.. ఫ్యూచర్ సిటీలో కొత్త టెక్నాలజీ

హైదరాబాద్ నగరానికి 40 కిలోమీటర్ల దూరంలో రాష్ట్ర ప్రభుత్వం ఎంతో ప్రతిష్ఠాత్మకంగా చేపట్టిన 'భారత్ ఫ్యూచర్ సిటీ' పనులు వేగవంతం అయ్యాయి. కందుకూరు మండలంలోని మీర్‌ఖాన్ పేట్, ముచ్చర్ల గ్రామాల మధ్య సుమారు 30 వేల ఎకరాల్లో నిర్మిస్తున్న ఈ భారీ ప్రాజెక్టును వచ్చే 30 నెలల్లోగా పూర్తి చేయాలని సీఎం రేవంత్ రెడ్డి అధికారులకు లక్ష్యాన్ని నిర్దేశించారు. ఈ మేరకు ఫ్యూచర్ సిటీ డెవలప్‌మెంట్ కార్పొరేషన్ అధికారులతో సీఎం స్వయంగా వివరాలు పంచుకుంటూ దిశానిర్దేశం చేశారు.

మొదట్లో ఇక్కడ కేవలం స్కిల్స్ యూనివర్సిటీ, ఏఐ సిటీ, స్పోర్ట్స్ సిటీలను మాత్రమే ఏర్పాటు చేయాలని భావించినప్పటికీ, ఇప్పుడు దీని పరిధిని మరింత విస్తరించారు. ప్రపంచంలోని ఫార్చ్యూన్ 500 కంపెనీల్లో దాదాపు 70 శాతం సంస్థలు తమ కార్యాలయాలను ఇక్కడ ఏర్పాటు చేసేలా ఈ నగరాన్ని తీర్చిదిద్దుతున్నారు. మొత్తం 11 టౌన్‌షిప్‌లుగా విభజించి, పర్యావరణానికి హాని కలగని రీతిలో నిర్మాణాలు చేపట్టనున్నారు. ఇందులో 300 ఎకరాల్లో ఏఐ సిటీ, 200 ఎకరాల్లో హెల్త్ సిటీ, 3 వేల ఎకరాల్లో లైఫ్ సైన్సెస్ హబ్, 500 ఎకరాల్లో ఎడ్యుకేషన్ హబ్‌ను ఏర్పాటు చేస్తున్నారు.

ఏసీలు లేని కూలింగ్ సిస్టమ్
ఈ ఫ్యూచర్ సిటీలో మరో ప్రత్యేకత 'డిస్ట్రిక్ట్ కూలింగ్ సిస్టమ్' (డీసీఎస్). సాధారణంగా వాడే ఏసీలకు బదులుగా, పైపుల ద్వారా చల్లని నీటిని పంపి భవనాలను చల్లబరిచే అధునాతన విధానాన్ని ఇక్కడ అమలు చేయనున్నారు. ఇందుకోసం శుద్ధి చేసిన నీటిని 5 డిగ్రీలకు శీతలీకరించి సరఫరా చేస్తారు. గుజరాత్‌లోని గిఫ్ట్ సిటీ తరహాలో ఈ టెక్నాలజీని తెలంగాణలో తొలిసారిగా ప్రభుత్వం ప్రవేశపెడుతోంది. దీనివల్ల 30 శాతం విద్యుత్ ఆదా అవ్వడంతో పాటు నగర ఉష్ణోగ్రతలు తగ్గుతాయని నిపుణులు చెబుతున్నారు.

ఇప్పటికే ఎడ్యుకేషన్ సిటీలో భాగంగా 2024 డిసెంబరులో నైపుణ్య విశ్వవిద్యాలయాన్ని ప్రారంభించగా, యంగ్ ఇండియా సమీకృత గురుకుల పాఠశాల పనులు కూడా మొదలయ్యాయి. త్వరలోనే మిగిలిన టౌన్‌షిప్‌ల నిర్మాణాలు కూడా ప్రారంభం కానున్నాయి.