Sarfaraz Khan: సర్ఫరాజ్ ను తీసుకోకపోవడం సిగ్గుచేటు: సెలెక్టర్లపై వెంగ్‌సర్కార్ ఫైర్

టీమిండియా యువ బ్యాటర్ సర్ఫరాజ్ ఖాన్‌ను సెలక్టర్లు పదేపదే విస్మరించడంపై భారత మాజీ కెప్టెన్, మాజీ చీఫ్ సెలక్టర్ దిలీప్ వెంగ్‌సర్కార్ తీవ్ర అసహనం వ్యక్తం చేశాడు. దేశవాళీ క్రికెట్‌లో టన్నుల కొద్దీ పరుగులు చేస్తున్న సర్ఫరాజ్‌కు మూడు ఫార్మాట్లలోనూ ఆడే సత్తా ఉందని, అలాంటి ప్రతిభావంతుడిని పక్కన పెట్టడం బాధాకరమని అభిప్రాయపడ్డాడు.

ప్రస్తుతం జరుగుతున్న విజయ్ హజారే ట్రోఫీలో ముంబై తరఫున ఆడుతున్న సర్ఫరాజ్ ఖాన్, గోవాపై జరిగిన మ్యాచ్‌లో కేవలం 75 బంతుల్లోనే 157 పరుగుల విధ్వంసకర ఇన్నింగ్స్ ఆడాడు. ఇందులో 14 సిక్సర్లు, 9 ఫోర్లు ఉన్నాయి. అంతకుముందు సయ్యద్ ముస్తాక్ అలీ ట్రోఫీలోనూ అద్భుతంగా రాణించాడు. ఈ నేపథ్యంలోనే వెంగ్‌సర్కార్ వ్యాఖ్యలు ప్రాధాన్యం సంతరించుకున్నాయి.

ఓ జాతీయ మీడియా సంస్థతో వెంగ్‌సర్కార్ మాట్లాడుతూ.. ఇంగ్లండ్‌తో టెస్టు సిరీస్‌లో అవకాశం వచ్చినప్పుడు సర్ఫరాజ్ అద్భుతంగా ఆడాడని, ఆ తర్వాత ఆస్ట్రేలియా పర్యటనకు ఎంపికైనా ఒక్క మ్యాచ్‌లోనూ అవకాశం ఇవ్వలేదని గుర్తుచేశాడు. ఇది చాలా ఆశ్చర్యం కలిగిస్తోందని అన్నాడు. అన్ని ఫార్మాట్లకు తగ్గట్టుగా తన ఆటను మార్చుకోగల సత్తా ఉన్న ఆటగాడిని ఇలా విస్మరించడం నిజంగా సిగ్గుచేటని తీవ్రంగా విమర్శించాడు.

దేశవాళీ క్రికెట్‌లో నిలకడగా రాణిస్తున్నా, భారత జట్టులో అరంగేట్రం చేసిన సిరీస్‌లో మంచి ప్రదర్శన చేసినా.. సర్ఫరాజ్‌కు ఆశించిన స్థాయిలో అవకాశాలు రాకపోవడంపై క్రికెట్ వర్గాల్లో చర్చ జరుగుతోంది. మాజీ దిగ్గజం వెంగ్‌సర్కార్ వ్యాఖ్యలతో ఈ అంశం మరోసారి తెరపైకి వచ్చింది.