కర్నూలు, కడప మీదుగా భారీ గ్రీన్‌ఫీల్డ్ కారిడార్... కొత్త హైవేకు కేంద్ర కేబినెట్ గ్రీన్ సిగ్నల్

దేశంలో మౌలిక సదుపాయాల కల్పన దిశగా కేంద్ర ప్రభుత్వం మరో కీలక ముందడుగు వేసింది. ప్రధానమంత్రి నరేంద్ర మోదీ అధ్యక్షతన బుధవారం సమావేశమైన ఆర్థిక వ్యవహారాల కేబినెట్ కమిటీ (CCEA), మహారాష్ట్రలోని నాసిక్-షోలాపూర్-అక్కల్‌కోట్ మధ్య 6 వరుసల గ్రీన్‌ఫీల్డ్ కారిడార్ నిర్మాణానికి ఆమోదం తెలిపింది. రూ.19,142 కోట్ల భారీ వ్యయంతో నిర్మించనున్న ఈ రహదారి, ఆంధ్రప్రదేశ్‌లోని కర్నూలు, కడప మీదుగా చెన్నై వరకు అనుసంధానం కానుంది.

374 కిలోమీటర్ల పొడవైన ఈ యాక్సెస్-కంట్రోల్డ్ హైవే నిర్మాణం ద్వారా పశ్చిమ, తూర్పు తీరాల మధ్య రవాణా వ్యవస్థ మరింత పటిష్టం కానుంది. ఈ ప్రాజెక్టుతో సూరత్-చెన్నై మధ్య ప్రయాణ దూరం 201 కిలోమీటర్లు తగ్గనుండగా, ప్రయాణ సమయం ఏకంగా 31 గంటల నుంచి 17 గంటలకు పడిపోతుందని ప్రభుత్వం అంచనా వేస్తోంది. పీఎం గతిశక్తి నేషనల్ మాస్టర్ ప్లాన్‌లో భాగంగా చేపడుతున్న ఈ ప్రాజెక్టును బిల్డ్-ఆపరేట్-ట్రాన్స్‌ఫర్ (BOT) టోల్ పద్ధతిలో అభివృద్ధి చేయనున్నారు.

కేబినెట్ భేటీ అనంతరం కేంద్ర మంత్రి అశ్విని వైష్ణవ్ మాట్లాడుతూ, "ఈ రోజు నాసిక్-షోలాపూర్ కారిడార్ కు ఆమోదం లభించింది. ఇది అక్కల్‌కోట్ నుంచి కర్నూలు, కడప మీదుగా చెన్నై వరకు విస్తరిస్తుంది" అని స్పష్టం చేశారు. ఈ ప్రాజెక్టు ద్వారా ప్రత్యక్షంగా 251 లక్షల పనిదినాలు, పరోక్షంగా 313 లక్షల పనిదినాల ఉపాధి లభిస్తుందని అంచనా.

ఇదే సమావేశంలో, ఒడిశాలోని జాతీయ రహదారి-326 (మోహన-కోరాపుట్ సెక్షన్) విస్తరణకు కూడా కేంద్ర మంత్రివర్గం ఆమోదం తెలిపింది. రూ.1,526.21 కోట్ల వ్యయంతో చేపట్టనున్న ఈ ప్రాజెక్టు ద్వారా గజపతి, రాయగడ, కోరాపుట్ వంటి గిరిజన జిల్లాల్లో రవాణా సౌకర్యాలు మెరుగుపడనున్నాయి. ఈ పనులను ఇంజనీరింగ్, ప్రొక్యూర్‌మెంట్, కన్‌స్ట్రక్షన్ (EPC) పద్ధతిలో 24 నెలల్లో పూర్తి చేయాలని లక్ష్యంగా పెట్టుకున్నారు. ఈ రహదారి అభివృద్ధి వల్ల మోహన, కోరాపుట్ మధ్య ప్రయాణ సమయం దాదాపు 3 గంటలు ఆదా అవుతుంది.