Mohanlal: సినీ నటుడు మోహన్ లాల్ కు మాతృవియోగం
మలయాళ లెజెండరీ నటుడు మోహన్ లాల్ కుటుంబంలో విషాదం నెలకొంది. ఆయన తల్లి శాంతకుమారి (90) కన్నుమూశారు. వృద్ధాప్య సంబంధిత అనారోగ్య సమస్యలతో కొంతకాలంగా బాధపడుతున్న ఆమె, కొచ్చిలోని ఎలమక్కర ప్రాంతంలో ఉన్న మోహన్లాల్ నివాసంలో ఈరోజు తుదిశ్వాస విడిచినట్లు కుటుంబ సభ్యులు తెలిపారు. శాంతకుమారి అంత్యక్రియలను రేపు నిర్వహించనున్నట్లు వారు వెల్లడించారు.
శాంతకుమారి భర్త దివంగత విశ్వనాథన్ నాయర్ ప్రభుత్వ ఉద్యోగిగా పనిచేశారు. కుటుంబాన్ని ఎంతో సాదాసీదాగా, విలువలతో పెంచిన తల్లిగా శాంతకుమారికి ప్రత్యేక గుర్తింపు ఉంది. వెలుగులోకి రాకుండా, హడావుడికి దూరంగా జీవించిన ఆమె, తన మంచితనంతో, సరళమైన వ్యక్తిత్వంతో అందరి అభిమానాన్ని చూరగొన్నారని కుటుంబానికి దగ్గరగా ఉన్నవారు చెబుతున్నారు.
మోహన్ లాల్ సినీ జీవితంలో శాంతకుమారి పాత్ర ఎంతో కీలకమైనది. ఆయన ఎన్నో సందర్భాల్లో తన విజయాలకు తల్లే ప్రధాన కారణమని, తన జీవితానికి ఆమెనే బలమైన పునాదిగా పేర్కొన్నారు. సినిమాల విషయంలో ఆమె ఎప్పుడూ తన కుమారుడికి అండగా నిలిచేవారని, ఆయన నటించిన చిత్రాలను ఎంతో ఆసక్తిగా వీక్షించేవారని తెలిసింది. తల్లి పట్ల మోహన్ లాల్కు ఉన్న మమకారం గురించి ఇండస్ట్రీలో అందరికీ తెలుసు.
ఇటీవల ఢిల్లీలో ప్రతిష్ఠాత్మక దాదాసాహెబ్ ఫాల్కే అవార్డు అందుకున్న సందర్భంగా, ముందుగా తన తల్లి ఆశీర్వాదాలు తీసుకున్న మోహన్ లాల్ దృశ్యం అందరినీ భావోద్వేగానికి గురిచేసింది. శాంతకుమారి మృతి వార్త తెలిసిన వెంటనే సినీ, రాజకీయ ప్రముఖులు, అభిమానులు పెద్ద ఎత్తున సంతాపం వ్యక్తం చేస్తున్నారు.
