టీ20 ప్రపంచకప్ జట్టులో జితేశ్ శర్మకు చోటు దక్కకపోవడంపై ఫ్యాన్స్ ఫైర్

భారత్, శ్రీలంక వేదికగా 2026లో జరగనున్న టీ20 ప్రపంచకప్‌ కోసం భారత జట్టును సెలక్టర్లు శనివారం ప్రకటించారు. సూర్యకుమార్ యాదవ్ కెప్టెన్‌గా, అక్షర్ పటేల్ వైస్ కెప్టెన్‌గా వ్యవహరించనున్నారు. అయితే ఈ జట్టు ఎంపిక అభిమానుల్లో తీవ్ర చర్చకు దారితీసింది. ముఖ్యంగా వికెట్ కీపర్, బ్యాటర్ జితేశ్ శర్మను పక్కనపెట్టడంపై సోషల్ మీడియాలో పెద్ద ఎత్తున విమర్శలు వెల్లువెత్తుతున్నాయి.

ఇటీవల భారత జట్టుకు ఆడిన మ్యాచ్‌లలో జితేశ్ అద్భుతంగా రాణించాడని, ముఖ్యంగా ఆస్ట్రేలియా, దక్షిణాఫ్రికా సిరీస్‌లలో ఫినిషర్‌గా తన పాత్రకు పూర్తి న్యాయం చేశాడని అభిమానులు గుర్తుచేస్తున్నారు. "జితేశ్ ఏం తప్పు చేశాడు?", "అంతర్జాతీయ స్థాయిలో సత్తా చాటినా ఎందుకు అవకాశం ఇవ్వలేదు?" అంటూ నెటిజన్లు చీఫ్ సెలక్టర్ అజిత్ అగార్కర్‌ను ప్రశ్నిస్తున్నారు. కొందరైతే ఫినిషర్‌గా రింకు సింగ్ కంటే జితేశ్ మెరుగ్గా ఉన్నాడని అభిప్రాయపడుతున్నారు.

ఈ విమర్శలపై చీఫ్ సెలక్టర్ అజిత్ అగార్కర్ స్పందించాడు. జితేశ్ శర్మ అద్భుతమైన ఆటగాడేనని, కానీ జట్టు కూర్పు దృష్ట్యా ఈ నిర్ణయం తీసుకోవాల్సి వచ్చిందని తెలిపాడు. టాప్ ఆర్డర్‌లో బ్యాటింగ్ చేయగల వికెట్ కీపర్ అవసరం ఉందని, అందుకే ప్రధాన కీపర్ సంజూ శాంసన్‌కు బ్యాకప్‌గా ఇషాన్ కిషన్‌ను ఎంపిక చేశామని వివరించాడు. దేశవాళీ టోర్నీ సయ్యద్ ముస్తాక్ అలీ ట్రోఫీలో ఇషాన్ అద్భుతంగా రాణించడం కూడా అతడి ఎంపికకు దోహదపడింది.

ఈ మెగా టోర్నీ 2026 ఫిబ్రవరి 7 నుంచి మార్చి 8 వరకు జరగనుంది. సూర్యకుమార్ సారథ్యంలో ప్రకటించిన ఈ జట్టులో శుభ్‌మన్ గిల్‌కు కూడా చోటు దక్కలేదు. అయితే, ప్రస్తుతం జితేశ్ శర్మ ఎంపికపై మాత్రం సోషల్ మీడియాలో చర్చ కొనసాగుతూనే ఉంది.