నిర్మాత నవీన్ యెర్నేని పేరిట మోసాలు... మైత్రీ మూవీ మేకర్స్ కీలక ప్రకటన

ప్రముఖ నిర్మాణ సంస్థ మైత్రీ మూవీ మేకర్స్ తమ నిర్మాతల్లో ఒకరైన నవీన్ యెర్నేని పేరుతో మోసాలు జరుగుతున్నాయని వెల్లడించింది. ఓ గుర్తుతెలియని వ్యక్తి నవీన్ యెర్నేని పేరు వాడుకుంటూ ప్రజలను తప్పుదోవ పట్టిస్తున్నట్లు తమ దృష్టికి వచ్చిందని, అందరూ అప్రమత్తంగా ఉండాలని హెచ్చరించింది. ఈ మేరకు తమ అధికారిక ఎక్స్ ఖాతాలో ఓ ప్రకటన విడుదల చేసింది.

వివరాల్లోకి వెళితే, ఓ వ్యక్తి +91 7543869902 ఫోన్ నంబర్‌తో పాటు 'yerneninaveen' పేరుతో ఉన్న ఇన్‌స్టాగ్రామ్ ఖాతాను ఉపయోగించి తానే నవీన్ యెర్నేని అని నమ్మించే ప్రయత్నం చేస్తున్నాడని మైత్రీ మూవీ మేకర్స్ తెలిపింది. ఈ ఫోన్ నంబర్, ఇన్‌స్టాగ్రామ్ ఖాతాతో తమకు ఎలాంటి సంబంధం లేదని స్పష్టం చేసింది. ప్రజలు ఎవరూ ఈ మోసాన్ని నమ్మవద్దని సూచించింది.

ఈ నకిలీ ఫోన్ నంబర్‌ను, ఇన్‌స్టాగ్రామ్ ఖాతాను వెంటనే రిపోర్ట్ చేయాలని ప్రజలకు విజ్ఞప్తి చేసింది. తమ సంస్థకు సంబంధించిన ఎలాంటి అధికారిక సమాచారమైనా '@MythriOfficial' అనే తమ అధికారిక సోషల్ మీడియా హ్యాండిల్స్ ద్వారా మాత్రమే వెల్లడిస్తామని స్పష్టం చేసింది. సినీ అవకాశాలు, ఇతర వ్యవహారాల పేరుతో జరిగే ఇలాంటి మోసాల పట్ల జాగ్రత్తగా ఉండాలని చిత్ర బృందం కోరింది.