విమానంలో పొగతాగుతూ పట్టుబడ్డ పాక్ హాకీ జట్టు మేనేజర్.. విమానం నుంచి కిందకు దించేసిన సిబ్బంది

పాకిస్థాన్ హాకీ క్రీడారంగాన్ని ఓ వివాదం కుదిపేస్తోంది. ఆ దేశ హాకీ జట్టు మేనేజర్‌గా వ్యవహరిస్తున్న ప్రముఖ ఒలింపియన్ అంజుమ్ సయీద్, విమానంలో పొగతాగుతూ పట్టుబడటం తీవ్ర చర్చనీయాంశంగా మారింది. అర్జెంటీనాలో జరిగిన ఎఫ్‌ఐహెచ్ ప్రో లీగ్ ముగించుకుని జట్టుతో కలిసి తిరుగు ప్రయాణమైన ఆయనను, మార్గమధ్యంలో బ్రెజిల్‌లో విమానం నుంచి కిందకు దించేశారు. ఈ ఘటన పాకిస్థాన్ క్రీడారంగానికి తీవ్ర అవమానం కలిగించింది.

వివరాల్లోకి వెళితే, పాక్ హాకీ జట్టు దుబాయ్ వెళ్లే విమానంలో ప్రయాణిస్తోంది. ఈ విమానం బ్రెజిల్‌లోని రియో డి జనీరో విమానాశ్రయంలో ఇంధనం నింపుకోవడం కోసం ఆగింది. అదే సమయంలో అంజుమ్ సయీద్ విమానంలో పొగతాగడం సిబ్బంది దృష్టికి వెళ్లింది. భద్రతా నిబంధనలను ఉల్లంఘించడంతో, ఆయనతో పాటు మరో ఆటగాడిని కూడా విమానం ఎక్కేందుకు సిబ్బంది నిరాకరించారు. దీంతో వారిద్దరూ అక్కడే ఉండిపోవాల్సి వచ్చింది.

అయితే, స్వదేశానికి చేరుకున్న తర్వాత అంజుమ్ ఈ విషయాన్ని కప్పిపుచ్చుకునే ప్రయత్నం చేశారు. తనకు దుబాయ్‌లో వ్యక్తిగత పనులు ఉండటంతో జట్టుతో కలిసి రాలేదని చెబుతున్నారు. కానీ ఈ వ్యవహారం పాకిస్థాన్ స్పోర్ట్స్ బోర్డు దృష్టికి వెళ్ళింది. ఇది దేశ ప్రతిష్ఠకు భంగం కలిగించే చర్య అని తీవ్రంగా పరిగణించిన బోర్డు, దీనిపై స్వతంత్ర విచారణ జరపాలని పాకిస్థాన్ హాకీ ఫెడరేషన్‌ను (పీహెచ్ఎఫ్) ఆదేశించింది.

1992 ఒలింపిక్స్‌లో సెమీస్ ఆడిన, 1994లో ప్రపంచ కప్ గెలిచిన జట్టులో సభ్యుడిగా ఉన్న అంజుమ్ సయీద్ వంటి సీనియర్ క్రీడాకారుడు ఇలా ప్రవర్తించడంపై సర్వత్రా విమర్శలు వెల్లువెత్తుతున్నాయి.