Malayalam Actress: ఎవరికీ చెప్పకుండా ఉండాల్సింది: లైంగిక వేధింపుల కేసులో మలయాళ బాధిత నటి వ్యాఖ్య

2017 కిడ్నాప్ మరియు లైంగిక వేధింపుల కేసులో దోషుల్లో ఒకరు విడుదల చేసిన వీడియో చూసి దిగ్భ్రాంతికి గురయ్యానని బాధిత మలయాళ నటి వెల్లడించారు. అయితే, ఈ కేసులో తాను చట్టపరమైన పోరాటం చేసినందుకు విచారం వ్యక్తం చేస్తున్నానని తెలిపారు. న్యాయపోరాటం చేయకుండా ఉంటే బాగుండేదేమోనని వ్యాఖ్యానించారు. ఎనిమిదేళ్ల క్రితం జరిగిన ఈ ఘటనకు సంబంధించిన కేసులో ఎర్నాకుళం సెషన్స్ కోర్టు కొద్ది రోజుల క్రితం ఆరుగురికి 20 ఏళ్ల జైలు శిక్ష విధించింది. ఇదే కేసులో నటుడు దిలీప్‌ని న్యాయస్థానం నిర్దోషిగా తేల్చింది. ఈ కేసులో తీర్పు వెలువడిన అనంతరం ఆమె రెండోసారి స్పందించారు.

తన వ్యక్తిగత గోప్యతకు భంగం కలిగించేలా సోషల్ మీడియాలో వీడియోలు పోస్టు చేశారని, తీర్పు వెలువడిన కొద్దిరోజులకు బాధిత నటి సైబర్ క్రైమ్ పోలీసులను ఆశ్రయించారు. దీంతో ఆ వీడియోను ప్రచారం చేసిన 21 సోషల్ మీడియా ఖాతాలను పోలీసులు గుర్తించారు. ఈ పరిణామాలపై బాధిత నటి స్పందించారు.

ఆ ఘటన గురించి తాను ఎవరికీ చెప్పకుండా ఉండాల్సిందని ఆమె ఆవేదన వ్యక్తం చేశారు. ఒక నిందితుడు తీసిన వీడియో సోషల్ మీడియాలో కనిపించిందని ఆమె పేర్కొన్నారు. ఈ పరిస్థితి మీకు, మీ కుటుంబ సభ్యులకు రాకూడదని, తనను సాధారణ జీవితం గడపనీయాలని ఆమె విజ్ఞప్తి చేశారు. "బాధితురాలిగా కాదు, ప్రాణాలతో బయటపడిన వ్యక్తిగా కూడా కాదు, ఒక సాధారణ మహిళగా నన్ను బతకనీయండి" అని ఆమె కోరారు.