Cameron Green: ఐపీఎల్ వేలంలో రికార్డు ధర లభించడంపై కామెరాన్ గ్రీన్ స్పందన

"ఈ ఏడాది ఐపీఎల్‌లో కోల్‌కతా జట్టులో భాగమైనందుకు చాలా ఉత్సాహంగా ఉంది. ఈడెన్ గార్డెన్స్‌లో ఆడేందుకు, అక్కడి వాతావరణాన్ని ఆస్వాదించేందుకు ఎదురుచూస్తున్నాను. ఈ ఏడాది మాకు గొప్పగా ఉంటుందని ఆశిస్తున్నాను. త్వరలో కలుద్దాం" అని ఆస్ట్రేలియా ఆల్‌రౌండర్ కామెరాన్ గ్రీన్ వ్యాఖ్యానించాడు. ఐపీఎల్ 2026 వేలంలో అతడిని కోల్‌కతా నైట్ రైడర్స్ (కేకేఆర్) రికార్డు స్థాయిలో రూ. 25.20 కోట్లకు కొనుగోలు చేసింది. ఈ నేపథ్యంలో కేకేఆర్ సోషల్ మీడియాలో పోస్ట్ చేసిన వీడియోలో గ్రీన్ తన స్పందనను తెలియజేశాడు.

అబుదాబిలోని ఎతిహాద్ ఎరీనాలో మంగళవారం జరిగిన ఈ వేలంలో గ్రీన్ ఐపీఎల్ చరిత్రలోనే అత్యంత ఖరీదైన ఆటగాడిగా నిలిచాడు. గతంలో కేకేఆర్ జట్టు రూ. 24.75 కోట్లకు కొనుగోలు చేసిన తన సహచర ఆటగాడు మిచెల్ స్టార్క్ రికార్డును గ్రీన్ అధిగమించాడు. నిజానికి, రిజిస్ట్రేషన్‌లో పొరపాటు కారణంగా అతడి పేరు 'బ్యాటర్'గా నమోదైనప్పటికీ, తాను టోర్నమెంట్‌లో బౌలింగ్ కూడా చేస్తానని స్పష్టం చేశాడు.

రూ. 2 కోట్ల కనీస ధరతో వేలంలోకి వచ్చిన గ్రీన్ కోసం తొలుత కోల్‌కతా, రాజస్థాన్ రాయల్స్ పోటీపడ్డాయి. బిడ్ రూ. 13 కోట్లకు చేరిన తర్వాత రాజస్థాన్ తప్పుకోవడంతో, చెన్నై సూపర్ కింగ్స్ బరిలోకి దిగింది. అత్యధికంగా రూ. 64.30 కోట్ల పర్సుతో వేలంలోకి వచ్చిన కేకేఆర్, చివరి వరకు పోటీపడి గ్రీన్‌ను సొంతం చేసుకుంది. కామెరాన్ గ్రీన్ 2023లో ముంబై ఇండియన్స్ తరఫున ఐపీఎల్‌లోకి అడుగుపెట్టాడు. ఆనాడు అతడిని ముంబై జట్టు రూ. 17.5 కోట్లకు కొనుగోలు చేసింది.