ఐపీఎల్ వేలంలో జాక్‌పాట్ కొట్టిన‌ పతిరణ‌... క‌ల‌లో కూడా ఊహించ‌ని ధ‌ర

ఐపీఎల్ వేలంలో శ్రీలంక యువ పేసర్ మతీశ పతిరణ‌ జాక్‌పాట్ కొట్టాడు. అతడిని కోల్‌కతా నైట్‌రైడర్స్ (కేకేఆర్) ఫ్రాంచైజీ ఏకంగా రూ.18 కోట్ల భారీ ధరకు కొనుగోలు చేసింది. తన అసాధారణ బౌలింగ్ శైలితో గుర్తింపు పొందిన ఈ యార్కర్ స్పెషలిస్ట్ కోసం కేకేఆర్ తమ పర్సులోని అధిక మొత్తాన్ని వెచ్చించడం ప్రాధాన్యత సంతరించుకుంది.

ఈ కొనుగోలుతో కోల్‌కతా బౌలింగ్ విభాగం మరింత పటిష్ఠంగా మారింది. ఇప్పటికే జట్టుతో ఉన్న అనుభవజ్ఞులైన టిమ్ సౌథీ, డ్వేన్ బ్రావోల మార్గదర్శకత్వంలో పతిరణ‌ ఆడనున్నాడు. వీరిద్దరి పర్యవేక్షణలో అతని నైపుణ్యాలు మరింత మెరుగవుతాయని క్రీడా విశ్లేషకులు అభిప్రాయ‌ప‌డుతున్నారు.

గత సీజన్లలో చెన్నై సూపర్ కింగ్స్ తరఫున ఆడిన పతిరణ‌, డెత్ ఓవర్లలో తన అద్భుతమైన బౌలింగ్‌తో జట్టు విజయాల్లో కీలక పాత్ర పోషించాడు. ఇప్పుడు కేకేఆర్ తరఫున కూడా అదే ప్రదర్శనను పునరావృతం చేస్తాడని ఫ్రాంచైజీ యాజమాన్యం గట్టి నమ్మకంతో ఉంది. ఈ వేలంలో అత్యధిక ధర పలికిన ఆటగాళ్లలో పతిరణ‌ ఒకడిగా నిలిచాడు.