Lionel Messi: వాంఖడేలో మెస్సీ.. సచిన్‌తో భేటీ.. 'రోహిత్ శర్మ' నామస్మరణతో హోరెత్తిన స్టేడియం!

ఫుట్‌బాల్ దిగ్గజం లియోనెల్ మెస్సీ 'గోట్ టూర్ ఆఫ్ ఇండియా 2025'లో భాగంగా నిన్న ముంబైలో పర్యటించారు. చారిత్రక వాంఖడే స్టేడియంలో జరిగిన ఈ కార్యక్రమంలో మెస్సీ, క్రికెట్ దేవుడు సచిన్ టెండూల్కర్, భారత ఫుట్‌బాల్ కెప్టెన్ సునీల్ ఛెత్రీలతో భేటీ అయ్యారు. క్రీడా ప్రపంచంలోని ముగ్గురు దిగ్గజాలు ఒకే వేదికపై కనిపించడంతో అభిమానుల ఆనందానికి అవధుల్లేకుండా పోయాయి.

అయితే, ఈ కార్యక్రమంలో ఒక ఆసక్తికర ఘటన చోటుచేసుకుంది. అభిమానులు మెస్సీని ఉత్సాహపరుస్తూనే, స్థానిక హీరో, టీమిండియా కెప్టెన్ రోహిత్ శర్మ పేరుతో నినాదాలు చేయడం విశేషం. "ముంబైచా రాజా, రోహిత్ శర్మ.. ఇండియాచా రాజా, రోహిత్ శర్మ" అంటూ వాంఖడే స్టేడియాన్ని హోరెత్తించారు. ఈ ఈవెంట్‌లో మెస్సీ, రోహిత్‌ను కలవలేదు.

ఈ సందర్భంగా సచిన్ టెండూల్కర్ మాట్లాడుతూ, మెస్సీ ముంబైకి రావడం ఒక స్వర్ణ ఘట్టమని అభివర్ణించారు. 2011లో ఇదే మైదానంలో భారత్ ప్రపంచ కప్ గెలిచిన క్షణాలతో ఈ రోజును పోల్చారు. "మెస్సీ వంటి గొప్ప ఆటగాళ్లు ఇక్కడ ఉండటం ముంబైకి, భారత్‌కు గర్వకారణం. ఆయన అంకితభావం, నిబద్ధత అందరికీ ఆదర్శం" అని సచిన్ ప్రశంసించారు. ఈ కార్యక్రమంలో మెస్సీతో పాటు అతని సహచరులు లూయిస్ సువారెజ్, రోడ్రిగో డి పాల్ కూడా పాల్గొన్నారు.