Stock Market: స్టాక్ మార్కెట్‌లో భారీ నష్టాలు.. టాప్-10 కంపెనీల రూ.79,000 కోట్లు ఆవిరి

గత వారం దేశీయ స్టాక్ మార్కెట్లలో నెలకొన్న బలహీనమైన సెంటిమెంట్ కారణంగా దేశంలోని అత్యంత విలువైన టాప్-10 కంపెనీలలో 8 సంస్థలు భారీగా నష్టపోయాయి. ఈ కంపెనీలు వారం వ్యవధిలో తమ మార్కెట్ క్యాపిటలైజేషన్ (విలువ) నుంచి ఏకంగా రూ.79,129.21 కోట్లను కోల్పోయాయి. ఇందులో బజాజ్ ఫైనాన్స్ అత్యధికంగా నష్టపోయిన సంస్థగా నిలిచింది.

బజాజ్ ఫైనాన్స్ మార్కెట్ విలువ ఏకంగా రూ.19,289.7 కోట్లు తగ్గి రూ.6,33,106.69 కోట్లకు చేరింది. ఆ తర్వాతి స్థానంలో ఐసీఐసీఐ బ్యాంక్ ఉంది. ఈ బ్యాంకు మార్కెట్ క్యాప్ రూ.18,516.31 కోట్లు క్షీణించి రూ.9,76,668.15 కోట్లకు పడిపోయింది. 

ఇదే బాటలో భారతీ ఎయిర్‌టెల్ (రూ.13,884 కోట్లు), స్టేట్ బ్యాంక్ ఆఫ్ ఇండియా (రూ.7,846 కోట్లు), ఇన్ఫోసిస్ (రూ.7,145 కోట్లు), టీసీఎస్ (రూ.6,783 కోట్లు), హెచ్‌డీఎఫ్‌సీ బ్యాంక్ (రూ.4,460 కోట్లు) కూడా భారీగా నష్టపోయాయి. లైఫ్ ఇన్సూరెన్స్ కార్పొరేషన్ ఆఫ్ ఇండియా (LIC) కూడా రూ.1,201 కోట్లు నష్టపోయింది.

అయితే, ఈ ప్రతికూల మార్కెట్ పరిస్థితుల్లోనూ రిలయన్స్ ఇండస్ట్రీస్, లార్సెన్ & టూబ్రో (L&T) లాభాలను నమోదు చేశాయి. రిలయన్స్ ఇండస్ట్రీస్ మార్కెట్ విలువ రూ.20,434.03 కోట్లు పెరిగి రూ.21,05,652.74 కోట్లకు చేరుకుంది. లార్సెన్ & టూబ్రో విలువ రూ.4,910.82 కోట్లు పెరిగి రూ.5,60,370.38 కోట్లకు చేరింది.

గత వారం బీఎస్ఈ బెంచ్‌మార్క్ ఇండెక్స్ సెన్సెక్స్ 444.71 పాయింట్లు (0.51 శాతం) పడిపోవడం ఈ నష్టాలకు ప్రధాన కారణం. మార్కెట్ ఒడుదొడుకులకు గురైనప్పటికీ హెచ్‌డీఎఫ్‌సీ బ్యాంక్, రిలయన్స్, టీసీఎస్ వంటి సంస్థలు దేశంలో అత్యంత విలువైన కంపెనీలుగా తమ స్థానాలను నిలబెట్టుకున్నాయి.