పాక్‌తో 'నో షేక్ హ్యాండ్'... సీనియర్ల బాటలోనే జూనియర్ టీమిండియా!

భారత్, పాకిస్థాన్ క్రికెట్ జట్ల మధ్య మైదానంలో దూరం కొనసాగుతోంది. తాజాగా అండర్-19 మెన్స్ ఆసియా కప్‌లోనూ భారత జట్టు పాకిస్థాన్‌తో 'నో షేక్ హ్యాండ్' విధానాన్ని అనుసరించింది. దుబాయ్‌లోని ఐసీసీ అకాడమీ గ్రౌండ్‌లో ఆదివారం జరిగిన మ్యాచ్‌లో టాస్ సందర్భంగా ఈ ఘటన చోటుచేసుకుంది. భారత కెప్టెన్ ఆయుష్ మాత్రే, పాక్ కెప్టెన్ ఫర్హాన్ యూసఫ్ కనీసం కరచాలనం చేసుకోలేదు. ఒకరి ముఖం ఒకరు చూసుకోకుండానే టాస్ ప్రక్రియను ముగించి, తమ డ్రెస్సింగ్ రూమ్‌లకు వెళ్లిపోయారు.

పహల్గామ్ ఉగ్రదాడుల నేపథ్యంలో... ఇటీవల ముగిసిన ఆసియా కప్ 2025లో టీమిండియా సీనియర్ పురుషుల జట్టు ఈ 'నో షేక్ హ్యాండ్' విధానాన్ని ప్రారంభించింది. టోర్నీలో పాకిస్థాన్‌తో ఆడిన మూడు మ్యాచ్‌లలోనూ భారత ఆటగాళ్లు కరచాలనం చేయలేదు. అంతేకాకుండా, పాకిస్థాన్ అంతర్గత వ్యవహారాల మంత్రిగా ఉన్న ఆసియా క్రికెట్ కౌన్సిల్ అధ్యక్షుడు మొహ్సిన్ నఖ్వీ చేతుల మీదుగా ట్రోఫీని స్వీకరించేందుకు కూడా నిరాకరించారు. ఆ తర్వాత మహిళల వన్డే ప్రపంచకప్‌లో కెప్టెన్ హర్మన్‌ప్రీత్ కౌర్ కూడా ఇదే విధానాన్ని కొనసాగించింది. ఇప్పుడు జూనియర్ జట్టు కూడా అదే బాటలో నడిచింది.

ఇక మ్యాచ్ విషయానికొస్తే, వర్షం కారణంగా దీన్ని 49 ఓవర్లకు కుదించారు. టాస్ గెలిచిన పాకిస్థాన్ బౌలింగ్ ఎంచుకుంది. తొలుత బ్యాటింగ్ చేస్తున్న భారత్, 20 ఓవర్లు ముగిసేసరికి 4 వికెట్ల నష్టానికి 114 పరుగులు చేసింది. 

కాగా, ఈ టోర్నమెంట్‌లో తమ తొలి మ్యాచ్‌లో యూఏఈపై భారత్ 234 పరుగుల భారీ తేడాతో గెలిచి రికార్డు స్కోరు (433/6) నమోదు చేయగా, మలేషియాపై పాకిస్థాన్ 297 పరుగుల తేడాతో విజయం సాధించింది.