Mythri Movie Makers: మా పేరుతో మోసాలు... ఆ ప్రకటనలు నమ్మవద్దు: మైత్రీ మూవీ మేకర్స్

ప్రముఖ నిర్మాణ సంస్థ మైత్రీ మూవీ మేకర్స్ తమ సంస్థ పేరుతో జరుగుతున్న మోసాలపై ప్రజలను అప్రమత్తం చేసింది. కొందరు వ్యక్తులు, ఏజెన్సీలు తమ సినిమాలలో అవకాశాలు ఇప్పిస్తామంటూ నకిలీ క్యాస్టింగ్ కాల్స్ నిర్వహిస్తున్నారని, వాటిని నమ్మవద్దని స్పష్టం చేసింది. తమ సంస్థకు సంబంధించిన ఏ ప్రకటన అయినా తమ అధికారిక సోషల్ మీడియా ఖాతా ద్వారా మాత్రమే వెలువడుతుందని తేల్చిచెప్పింది.

ఈ నేపథ్యంలో తమ నిర్మాతలలో ఒకరైన నవీన్ యెర్నేని పేరు మీద ఒక నకిలీ ఇన్‌స్టాగ్రామ్ ఖాతా తమ దృష్టికి వచ్చిందని మైత్రీ మూవీ మేకర్స్ యాజమాన్యం పేర్కొంది. అది పూర్తిగా ఫేక్ అకౌంట్ అని, దానిని ఎవరూ అనుసరించవద్దని కోరింది. ఇలాంటి మోసపూరిత ప్రలోభాలకు గురికావద్దని, డబ్బులు ఇచ్చి మోసపోవద్దని ఆసక్తి ఉన్న నటీనటులకు, ప్రజలకు విజ్ఞప్తి చేసింది.

ఎవరైనా మైత్రీ మూవీ మేకర్స్ పేరుతో సంప్రదించినా లేదా సోషల్ మీడియాలో అనుమానాస్పద ప్రొఫైల్స్ కనిపించినా, వాటిని వెంటనే రిపోర్ట్ చేయాలని సూచించింది. అధికారిక సమాచారం కోసం కేవలం తమ అధికారిక సోషల్ మీడియా హ్యాండిల్స్‌ను మాత్రమే అనుసరించాలని స్పష్టం చేసింది.