మెగా ఫ్యాన్స్‌కు మరో ట్రీట్.. వినసొంపైన ‘శశిరేఖ’ పాట వచ్చేసింది!

మెగాస్టార్ చిరంజీవి కథానాయకుడిగా నటిస్తున్న తాజా చిత్రం ‘మన శంకర వరప్రసాద్‌గారు’ (MSG) నుంచి చిత్ర బృందం మరో అప్‌డేట్ ఇచ్చింది. ఈ సినిమా నుంచి తాజాగా ‘శశిరేఖ’ అనే రెండో పాటను విడుదల చేశారు. ఇప్పటికే రిలీజైన ‘మీసాల పిల్ల’ పాట చార్ట్‌బస్టర్‌గా నిలిచిన నేపథ్యంలో, రెండో పాటపై నెలకొన్న అంచనాలను అందుకుంటూ ఈ గీతం శ్రోతలను ఆకట్టుకుంటోంది.

వినడానికి ఎంతో ఆహ్లాదకరంగా ఉన్న ఈ మెలోడీకి భీమ్స్ సిసిరోలియో స్వరాలు సమకూర్చారు. ప్రముఖ గేయ రచయిత అనంత శ్రీరామ్ అందించిన సాహిత్యం పాటకు ప్రాణం పోసింది. ఈ గీతాన్ని భీమ్స్‌తో కలిసి ప్రముఖ ఫోక్ సింగర్ మధుప్రియ ఆలపించారు. భాను మాస్టర్ కొరియోగ్రఫీ అందించగా, ఇందులో చిరంజీవి, నయనతార సంప్రదాయ వస్త్రధారణలో చాలా అందంగా కనిపించారు. వీరిద్దరి ఆన్-స్క్రీన్ కెమిస్ట్రీ ప్రత్యేక ఆకర్షణగా నిలిచింది.

స్టార్ డైరెక్టర్ అనిల్ రావిపూడి దర్శకత్వం వహిస్తున్న ఈ చిత్రంలో విక్టరీ వెంకటేశ్ మరో కీలక పాత్రలో నటిస్తున్నారు. కేథరిన్ థ్రెసా మరో కథానాయిక. ఈ చిత్రాన్ని షైన్ స్క్రీన్స్ పతాకంపై సాహు గారపాటి, సుష్మిత కొణిదెల, వి. హరికృష్ణ సంయుక్తంగా నిర్మిస్తున్నారు. వరుస అప్‌డేట్లతో సినిమాపై అంచనాలు అంతకంతకూ పెరుగుతున్నాయి.