ICC T20 World Cup 2026: టీ20 ప్రపంచకప్ కోసం టీమిండియా కొత్త జెర్సీ.. ప్రత్యేకతలివే!

రానున్న ఐసీసీ టీ20 ప్రపంచకప్ 2026 కోసం భారత క్రికెట్ జట్టు కొత్త జెర్సీని బీసీసీఐ ఆవిష్కరించింది. రాయ్‌పూర్‌లోని షహీద్ వీర్ నారాయణ్ సింగ్ అంతర్జాతీయ స్టేడియంలో బుధవారం భారత్, దక్షిణాఫ్రికా మధ్య జరిగిన రెండో వన్డే మ్యాచ్ ఇన్నింగ్స్ బ్రేక్‌లో ఈ జెర్సీని విడుదల చేశారు.

టీమిండియా కొత్త జెర్సీ ఎంతో ఆకర్షణీయంగా కనిపిస్తోంది. ముదురు నీలం రంగు ప్రధాన ఆకర్షణ కాగా, దానిపై నిలువుగా ముదురు రంగు చారలు ఉన్నాయి. జెర్సీకి ఇరువైపులా నారింజ రంగు ప్యానెల్స్‌ను జోడించారు. ఇది జెర్సీకి మరింత ఆకర్షణీయమైన లుక్‌ను తెచ్చింది.

జెర్సీ కాలర్‌పై భారత త్రివర్ణ పతాకంలోని కాషాయం, తెలుపు, ఆకుపచ్చ రంగులు ఉన్నాయి. ముందు భాగంలో అడిడాస్ లోగో, బీసీసీఐ చిహ్నంతో పాటు స్పాన్సర్ అపోలో టైర్స్ పేరును ముద్రించారు. మధ్యలో పెద్ద అక్షరాలతో 'INDIA' అని నారింజ రంగులో రాసి ఉంది. మొత్తంమీద ఈ జెర్సీ ఎంతో స్టైలిష్‌గా, స్పోర్టీగా, దేశభక్తిని రేకెత్తించేలా ఉంది.

ఐసీసీ టీ20 ప్రపంచకప్ 2026 టోర్నమెంట్ ఫిబ్రవరి 7న ముంబైలోని వాంఖడే స్టేడియంలో ప్రారంభం కానుంది. మార్చి 8న అహ్మదాబాద్‌లోని నరేంద్ర మోదీ స్టేడియంలో ఫైనల్ మ్యాచ్ జరుగుతుంది. అయితే, ఒకవేళ పాకిస్థాన్ ఫైనల్‌కు అర్హత సాధిస్తే మాత్రం తుదిపోరుకు కొలంబో ఆతిథ్యం ఇవ్వ‌నుంది.

టీ20 ప్రపంచకప్ లీగ్ స్టేజ్‌లో టీమిండియా మ్యాచ్‌ల షెడ్యూల్ ఇలా..
ఫిబ్రవరి 7 - యూఎస్‌ఏ వ‌ర్సెస్ భార‌త్‌ (వేదిక: ముంబై) 
ఫిబ్రవరి 12 - నమీబియా వ‌ర్సెస్ భార‌త్‌ (ఢిల్లీ)
ఫిబ్రవరి 15 - పాకిస్థాన్ వ‌ర్సెస్ భార‌త్‌ (ప్రేమదాస స్టేడియం, కొలంబో )
ఫిబ్రవరి 18 - నెదర్లాండ్స్ వ‌ర్సెస్ భార‌త్‌ (అహ్మదాబాద్)