అవతార్ 3' సందడి మొదలు... డిసెంబర్ 5 నుంచి ఐమ్యాక్స్ అడ్వాన్స్ బుకింగ్స్

ప్రపంచవ్యాప్తంగా సినీ ప్రియులు ఎంతో ఆసక్తిగా ఎదురుచూస్తున్న 'అవతార్' సీక్వెల్ నుంచి ఓ కీలక అప్‌డేట్ వచ్చింది. జేమ్స్ కామెరూన్ అద్భుత సృష్టికి కొనసాగింపుగా రానున్న 'అవతార్: ఫైర్ అండ్ యాష్' సినిమా ఐమ్యాక్స్ అడ్వాన్స్ బుకింగ్స్ డిసెంబర్ 5 నుంచి ప్రారంభం కానున్నట్లు అధికారికంగా ప్రకటించారు. ఈ చిత్రాన్ని ప్రపంచంలోనే అతిపెద్ద ఈవెంట్ ఫిల్మ్‌గా అభివర్ణిస్తున్నారు.

ప్రముఖ నిర్మాణ సంస్థ ట్వంటీయత్ సెంచరీ స్టూడియోస్ ఈ చిత్రాన్ని భారత్‌లో డిసెంబర్ 19న భారీ ఎత్తున విడుదల చేసేందుకు సన్నాహాలు చేస్తోంది. ఇండియాలో ఇంగ్లీష్, హిందీతో పాటు తెలుగు, తమిళం, కన్నడ, మలయాళం భాషల్లో ఈ సినిమా అందుబాటులోకి రానుంది. ఈసారి ఐమ్యాక్స్ అనుభవంతో పాటు, సినీ చరిత్రలోనే తొలిసారిగా డాల్బీ విజన్ సినిమా టెక్నాలజీతో ప్రేక్షకులకు సరికొత్త అనుభూతిని పంచనుంది.

'అవతార్' ఫ్రాంచైజీ గత చిత్రాలు బాక్సాఫీస్ వద్ద సృష్టించిన సంచలనాలు తెలిసిందే. విజువల్ వండర్‌గా ప్రేక్షకులను మరో ప్రపంచంలోకి తీసుకెళ్లిన ఈ సిరీస్‌లో మూడో భాగంగా వస్తున్న 'ఫైర్ అండ్ యాష్'పై ప్రపంచవ్యాప్తంగా భారీ అంచనాలు నెలకొని ఉన్నాయి. ఈ నేపథ్యంలో విడుదల తేదీకి రెండు వారాల ముందే అడ్వాన్స్ బుకింగ్స్ ప్రారంభం కానుండటంతో అభిమానుల్లో ఉత్సాహం నెలకొంది.